Read lunyore ETSISABURI 106 Bible Online

ETSISABURI 106 - lunyore bible

ETSISABURI 106

¹Mwitsoomie OMWAMI! Mumukhupile embwo, okhuba nomulahi, obuyanzi bubwe nobweinziayo.

²Niwina owakhaboola khukemilimo emikhongo echio MWAMI yakhola? Niwina onyala okhuhaana obwitsoomi obuhela?

³Nabobusangali yabo abalondanga amalako kaake, yabo abakholanga amalunji.

⁴OMWAMI, unzitsulile olwoba nokhonyanga abandu baabo; unyinjisie mubo olwoba nobanunula.

⁵Lekha ndole obutsitsachil'li bwabandu baabo, ma ndeyinjisie mubusangali bwelihanga lilio, abali ababo.

⁶Ifwe khwayona singa obwabakuka befwe bali okhwona, ifwe khwalinji abasiamu khandi ababi.

⁷Abakuka befwe olwa bali Emisiri, sibamanyilisia ebikhole bia Nyasaye ebiokhuchenya; bebil'la mbu yabamanyianga obuyanzi bubwe khasotso; khandi basula okhumuhulila Owokhunyala Biosi, nibali khundulo we Inyanza Inzakhanyu.

⁸Nebutswa yabahonia, singa yali niyabasubisia, khulwo khumanyia obukhongobwo obunyali bubwe.

⁹Yakondokhela Inyanza Inzakhanyu, ne amaatsi nikakhama muyo; yemel'la abandube okhukhalania inyanza khwiloba eliomu.

¹⁰Yabahonia okhurula khu yabo ababasinyikhilanga; nabasoola okhurula khubasuku babwe.

¹¹Nebutswa amaatsi kayila abasuku babwe, abulakhwoho kata mulala owahona.

¹²Kho abandu baabe basubila amasubisio kaake, ma nibemba tsinyembo tsiokhumwitsoomia.

¹³Ne khubwangu bebil'la akayali nakhol'le, nibachaaka okhukhola amang'ana sila okhulinda amachetsiyio kaake.

¹⁴Bali nende okhwekomba okhwinji nibali musitsiimi, ne nibateema Nyasaye.

¹⁵Kho yabahelesia esiabasabanga, nebutswa khandi yaruma mubo obulwaye obubi okhusila.

¹⁶Olwa bali musitsiimi, bali okhusiendekhela Musa, nende Haruni, omurumikhili wo MWAMI omutsienukhu.

¹⁷Kho esibala siekukha ma nisimila Datsani, ne nisiyabila Abiramu nende abeinyumba yiye.

¹⁸Omul'lo kwarumwa khubalondi babwe, ne nikusamba abandu ababi yabo.

¹⁹Balomba esisimosi siechulukhi yetsahabu nibali Sinai, ne nibekayakaya esiniini yisio;

²⁰basilania obukhongo bwa Nyasaye, nende esiniini siechulukhi elitsanga obunyasi.

²¹Nibebil'la Nyasaye owali okhubasoola, mu Misiri nende ebikholwa bibie biobunyali.

²²Mako obwabili ebiokhuchenyia ebiayakhola Emisiri! Mako obwabili ebiokhuhuka ebiayakhola ha Nyanza Inzakhanyu!

²³Olwa Nyasaye yaboola mbu yakhamume abandu baabe, Musa, omurumikhili uwe omwelwa, yasingila imbeli wa Nyasaye, nasisimasia lirima lio MWAMI alekhe okhubamuma.

²⁴Kho basuula esibala esikasu yisio, sichila sibasubila aka Nyasaye yali niyabasubisia tawe.

²⁵Bamenya mumaheema kabwe nibamumuchilanga, ne sibaali okhuhuhia khu ko MWAMI tawe.

²⁶Khulwe yako OMWAMI yachingula omukhono kukwe ikulu ma niyesuha mbu alabakhola bafwile musitsiimi.

²⁷Khandi alasalania abolwibulo lwabwe mumahanga, ma alekhe bafwile mubibala biebucheni.

²⁸Olwa bali Peori, abandu ba Nyasaye beyonga mukhwekayakaya khwa Baali, nende okhulia emisango echihanwanga khubanyasaye abafwa.

²⁹Basemula lirima lio MWAMI nende ebikholwa biabwe, ma olufu olubi ndubenjil'la.

³⁰Nebutswa Fenihasi yasinjila nahaana esinyasio khu yabo abali nesikha, ma kho obulwaye yibwo nibuhinibwa mubo.

³¹Yako kaba esitsusio siobulunji bubwe okhurula olwene yilwo, khandi kaletsul'wa netsinzibulo tsiosi inziayo.

³²Nibali mubitaho bia Meriba, abandu bachila OMWAMI nahambwa nelileko, ne Musa yanyoola linyakhano khulwabo.

³³Bachila naba omululu okhusila, ma nal'loma amang'ana narapaala khu akal'lomanga.

³⁴Sibaali okhwira abamahanga singa obwo MWAMI yabalaka okhukhola tawe,

³⁵nebutswa nibateesania n'nabo, ma nibachaaka okhukhola akemima chiabwe.

³⁶Abandu ba Nyasaye bekayakaya ebiniini, ne yako nikachila nibakhuywa.

³⁷Bali okhuhaana abasiani babwe nende abakhaana babwe, singa emisango khubiniini bia Bakanaani.

³⁸Bali okhwira abaana yabo ababula esikha, ne esibala siafwabibwa nende esiyayi isio.

³⁹Amang'ana akabakhola abene, kabakhola okhuba abomusilo; kho bali abarali abasubilwa khu Nyasaye.

⁴⁰Kho OMWAMI yali nelirima khubandube; bali okhumusinya.

⁴¹Yali okhubalekha mumakhono kabamahanga, ne abasuku babwe nibabaamiha.

⁴²Bali okhusandibwa nende abasuku babwe, khandi bali hasi wamalako kabwe.

⁴³Hali akhenji OMWAMI yasoolanga abandube, nebutswa beela okhumufukula, ma nibeyinikha mutsimbi mukari.

⁴⁴Ne kata mbwo, OMWAMI yali okhuhul'la amalakayo kabwe, khandi nalola okhutsunwa khwabwe.

⁴⁵Khulwabwe OMWAMI yetsul'la indakano yiye, khandi khulwobuyanzi bubwe obukali yamala nababelel'la.

⁴⁶Yachila ababasandinjia nibabeelel'la, yabo ababali nibara mubobohe.

⁴⁷Okhuhonie, OMWAMI Nyasaye wefwe, ma okhuchelesie okhurula mubamahanga, kho khube abanyala okhukhupila embwo, nende okhwitsoomia eliiralio litsienukhu.

⁴⁸Khumwitsoomie OMWAMI, Nyasaye wa Isiraeli; khumwitsoomie luno nende inziayo! Ma buli mundu aboole, “Amina!” OMWAMI yetsoomibwe!