Read lunyore ETSISABURI 107 Bible Online

ETSISABURI 107 - lunyore bible

ETSISABURI 107

¹“Khupile OMWAMI embwo sichila ye nomulahi; Obuyanzibwe nobweinziayo!”

²Inywe mwesi aba yali okhununula mukalukhile mumang'ana yako nimwitsoomianga OMWAMI, ye owamusoola khubasuku benywe

³ma wamuchelesia ingo okhurula mumahanga kebucheni, yamuchelesisie okhurula ebukwe nende emasaba, okhurula esinyolu nende enandete.

⁴Abalala babokaboka musitsiimi esimwamu, ne sibanyoola injila yokhwinjila mwitookho liokhumenyamwo tawe.

⁵Bali neinzala nende obuluho, ma bali nibahinisiekhwo omwoyo mubunaayi bwabwe bwosi.

⁶Ma mumunyakhano kwabwe bali okhulanga OMWAMI, naye nabasoola musibi siabwe siosi.

⁷Yabemel'la khunjila ingol'lokhu, okhwola mwitookho aha banyala okhumenya.

⁸Okhwola betsoomie OMWAMI, khulwobuyanzibwe oburalilu, khandi khulwebindu ebilahi ebia yabakhol'la.

⁹Yekusianga yabo abali nobuluho, nahelesia abali neinzala ebindu ebilahi ebinji.

¹⁰Abalala bamenyanga musibeela nende musiilima, basalilanga khulwo khubohwa khuminyololo,

¹¹sichila bali nibasuula amalako ka Nyasaye Wokhunyala Biosi, khandi nibachaaya amebaalo kaake.

¹²Bali okhuchonya khulwe emilimo emitinyu, bakhakwiye hasi, ne abulaho owakhabaleteleye.

¹³Ma mumunyakhano kwabwe bali okhulanga OMWAMI, naye nabasoola musibi siabwe siosi.

¹⁴Yabahinia musibeela siabwe nende musiilima, nakatula eminyol'lo chiabwe mubitonye.

¹⁵Okhwola betsoomie OMWAMI khulwa obuyanzibwe oburalilu, khulwe ebindu ebilahi ebia yabakholela.

¹⁶Afunakanga emiliango chiomukasa, nasasaka ebilibwa biebibia.

¹⁷Abalala bali abahingwa, basalilanga khulwe tsimbi tsiabwe, khandi khulwo obubi bwabwe abene.

¹⁸Babihil'lwa ebiokhulia biosi, ma nibaba ahembi okhufwa.

¹⁹Ma mumunyakhano kwabwe bali okhulanga OMWAMI, naye yabasoola musibi siabwe siosi.

²⁰Yabahonia khulwe lilako liomunwa kukwe, nabasoola khusilindwa.

²¹Okhwola betsoomie OMWAMI khulwo obuyanzi bubwe oburalilu, khulwe ebindu ebilahi ebia yabakholela.

²²Okhwola bamwitsoomie nebihanwa biemisango, khandi mutsinyembo tsiobusangali okhwola baboole kosi ako MWAMI yali okhukhola.

²³Abalala batsila mumeeli khunyanza, nibakhola obukhala khumaatsi amakali.

²⁴Bali okhulola ako MWAMI anyala okhukhola akokhuchenya kaake khumaatsi.

²⁵Yalaka ling'ana, ma imbumbuyeka nechaaka okhuhungutsa, natuubula ebikubuli.

²⁶Amarunda kahenula tsimeeli ikulu, ma nitsiekhupa hasi mutsindungu. Abandu barimukhwa ikholo musibi singa yisio;

²⁷besikaar'ra nibahutuma singa abakholwi bamalwa, obusitsa bwabwe bwosi sibwali esindu tawe.

²⁸Ma mumunyakhano kwabwe bali okhulanga OMWAMI, naye nabasoola musibi siabwe siosi.

²⁹Yalenjesia imbumbuyeka yamarunda, ne ebikubuli nibilekha.

³⁰Basangala khulwo okhulenjela khweinyanza, ma OMWAMI naboosia khuluchinga nomulembe.

³¹Okhwola betsoomie OMWAMI khulwo obuyanzibwe oburalilu, khulwe ebindu ebilahi ebia yabakholela.

³²Okhwola baboole khukobukhongobwe mwibukaana liabandu, nibamwitsoomia musiina siabemeli.

³³OMWAMI yachila emichela nichikhama pe, niyekal'la ebitaho birasenukhamwo amaatsi tawe.

³⁴Yakhola liloba liobunolu okhukwa esitsiimi siechumbi, khulwobubi obwe yabo abamenyangamwo.

³⁵Yakalukhania ebiyieyie okhukwa amatubango kamaatsi, ne esilangalangwe okhusenukhamwo amaatsi.

³⁶Yahuchil'la abandu beinzala okhumenyamwo, nabo nibombokhamwo litookho liokhumenyamwo.

³⁷Baraaka imwo nibasimikha emikunda chiemisabibu, nibachesa ebichese ebinji.

³⁸Yakaasia abandube nibaba nabaana abenji; yalinda emiruko chiabwe mbu chiratitiha tawe.

³⁹Olwa abandu ba Nyasaye balekwa nibaninil'lwa nobuminwi obululu nende obusalili,

⁴⁰Nyasaye yasinyikhila abasuku babwe, nabakhola okhutimatima musitsiimi esibulamwo injila.

⁴¹Nebutswa yanunula abatimi okhurula khubasuku babwe, nakhola olwibulo lwabwe okhumeetekha singa ebiayo.

⁴²Abalunji balolanga yaka nibasangala, nebutswa ababi bosi basiling'anisibubwe.

⁴³Yabo abali abachesi bakanil'le khumang'ana yaka; barunilisie obuyanzibwo MWAMI oburalilu.