Read lunyore ETSISABURI 109 Bible Online

ETSISABURI 109 - lunyore bible

ETSISABURI 109

¹Khwitsoomianga ibe Nyasaye; oratsilil'la okhusiling'ana tawe?

²Abandu ababi nende abakaati babeye okhuusera. Baboolanga akobubehi khu ise,

³khandi nibaboola ebindu ebibi khu ise, banyinjil'langa sila esifune.

⁴Baafukulanga kata olwa nase mbayanzanga, khandi mbasaayilangakhwo.

⁵Barunganga obubi khubulahi, khandi okhubihil'lwa khulwa obuyanzi.

⁶Wahule omukhalachi omubatsa okhuyaasia omusuku wanje, ma olekhe mulala khubasukube bene amusitaake.

⁷Lekha oyaalwe ma anyoolekhe nesikha, kata okhusaaya khukhwe khubalwe singa obusiamu?

⁸Obulamu bubwe buhakame bwangu, ne omundu undi abukule obukono bubwe!

⁹Abaanabe babe ababisandu, ne omukhasiwe asikale omulekhwa!

¹⁰Abaanabe babe abokhusabil'la abarali nehango; bakhunganibwe mumakunda omwa bamenyanga!

¹¹Yabo abayakopakhwo ebindu betse bayaake emianduchie chiosi, ne abacheni banyoole biosi ebia yatitikhan'na.

¹²Omundu wosi aramubeelel'lakhwo tsimbabasi tawe, arabbaho kata owokhuhendel'la abaanabe olwaba nafwiye tawe.

¹³Lekha abolwibulolwe bosi bafwe, ne eliira lilie libil'lwe mwisuuba elilondakhwo.

¹⁴OMWAMI yetsul'le obubi bwabakuka baabe, ne aralekhela tsimbi tsianyinawe tawe.

¹⁵OMWAMI yetsul'lenje tsimbi tsiabwe khasotso, nabo abene baretsul'lwakhwo kata tawe!

¹⁶Mbu omundu uyo siyakanakhwo okhubeela tsimbabasi tawe, yakhupia esibi ma niyeera abamanani, abatakha, nende abatiimi.

¹⁷Yayanzanga okhulama esilaamo siobubi naye alamwe! Yasuula okhulama tsikhabi, omundu aramulamila ikhabi tawe.

¹⁸Yalaka esilakamunwa siobubi singa obwa yebiikhanga ingubo; yebiikhanga ebilaamo singa ingubo yiye, lekha ebilaamobie bitsinzibie omubilikwe singa amaatsi, nende mumakumbake singa amafura!

¹⁹Lekha bimufuunikhe singa tsingubo, khandi bimubotokhane singa olukhoba mus'sienje!

²⁰OMWAMI, ohe abasuku banje esinyasio singa mbwo, yabo ababoolanga amabi khu ise!

²¹Nebutswa ibe OMWAMI Nyasaye wanje, ukhonye singa wali okhuusubisia, ma ununule khulwo obulahi bwobuyanzi bubwo.

²²Ndi omumanani khandi omutakha, saaliye okhusila muusi mumwoyo kwanje.

²³Singa esiinikha siokhwibwile ndi ahembi okhukora; mbulusibwanga singa esikoko.

²⁴Amasikamo kanje namatekhele khulwa okhutakha ebiokhulia, ndi butswa likhoba nende amakumba.

²⁵Olwa abandu bandolanga, banzekhanga; basungusanga emirwe chiabwe mukhuchaaya.

²⁶Ukhonye; E OMWAMI Nyasaye wanje, khulwa obuyanzibwo oburalilu umbonie!

²⁷Lekha basuku banje bamanye mbu niwe oumbonianga.

²⁸Banyala kata okhunaama esilaamo siobubi, nebutswa ibe unaamila ikhabi, yabo abakhupianga esibi balekwe, ne nase, omurumikhiliwo sangale.

²⁹Abasuku banje betsule netsisoni; bebiikhe es'simba murwe singa ingubo rambi.

³⁰Nakhupile OMWAMI embwo ingali, namwitsoomie mwibukana liabandu,

³¹sichila asoolanga omundu omumanani, namuhonia khuyabo abamukhalachilanga okhufwa.