Read lunyore ETSISABURI 115 Bible Online

ETSISABURI 115 - lunyore bible

ETSISABURI 115

¹Khuibe wenyene, E OMWAMI khuibe wenyene, ne tawe khu ifwe, oluyali luhanwenje, khulwobuyanzi bubwo oburalilu nende obusubilwa bubwo.

²Busina amahanga kakhureebe, “Nyasaye wenywe ali hena?”

³Nyasaye wefwe ali mwikulu; akholanga kosi akalalilanga omwene.

⁴Abanyasaye babwe balombwanga khufetsa nende khutsahabu, balongwanga namakhono kabandu.

⁵Bali neminwa nebutswa sibanyala okhul'loma tawe, bali netsimoni nebutswa sibanyala okhulola tawe.

⁶Bali namarwi nebutswa sibanyala okhuhulila tawe, bali namolu ne sibanyala okhuhunyilisia tawe.

⁷Bali namakhono ne sibanyala okhuhambilisia tawe, ne bali nebilenje ne sibanyala okhuchenda tawe, sibanyala okhuhiinia amayoosi kosi kosi tawe.

⁸Lekha yabo bosi ababalomba nende abasubilanga mubo, babe singa ebiniini ebia abene belombela.

⁹Musubile mu MWAMI, inywe abandu ba Isiraeli. Amuhabinanga namusoola inywe.

¹⁰Musubile mu MWAMI inywe abesaalisi ba Nyasaye. Amuhabinanga namusoola inywe.

¹¹Musubile mu MWAMI, inywe mwesi aba mwekayakayanga, Amuhabinanga namukhonya inywe.

¹²OMWAMI akhwitsul'langa ifwe ne nakhulaamile ikhabi, nalaamile Abaisiraeli ikhabi, nende abesaalisi ba Nyasaye bosi.

¹³Bosi abamufumianga alabalaamila ikhabi, abakhongo nende abati bosi bafwanani.

¹⁴OMWAMI amuhe abaana inywe nende olwibulo lwenywe!

¹⁵Mube netsikhabi tsio MWAMI owalomba esibala nende likulu!

¹⁶Likulu nelio MWAMI yenyene, nebutswa yahaana esibala khumundu.

¹⁷OMWAMI siyetsoomibwanga nende abafu tawe, siyetsoomibwanga nende yabo abaselenjeranga musibala siabafu tawe.

¹⁸Nebutswa, ifwe abali mwoyo, khulamwitsoomia luno nende inziayo. OMWAMI yetsoomibwe!