Read lunyore ETSISABURI 116 Bible Online

ETSISABURI 116 - lunyore bible

ETSISABURI 116

¹Nyanzanga OMWAMI sichila yambulilanga; arekanga esirwi khumasaayo kanje.

²Yambulilanga Ise lwosi olwa nanganga khuye.

³Linyakhano liokhufwa liambotokhana; ebirisio biesilindwa biokhufunikha bietsa khuise; ndetsula noburi nende esihenda mwoyo.

⁴Kho ndamala nange khu MWAMI mbu, “Khusaayanga OMWAMI umbonie!”

⁵OMWAMI nowetsimbabasi nende obulahi, Nyasaye wefwe abelel'langa abandu.

⁶OMWAMI asoolanga abatimi; olwa ndali musibi, yambonia.

⁷Ralila, omwoyo kwanje, sichila OMWAMI nomulahi khu ise.

⁸OMWAMI yambinia okhurula mukhufwa; yakhalisia amasika kanje niyambinia mukhulekwa.

⁹Khulwako njendanga mumoni tsio MWAMI, musibala esia abali mwoyo.

¹⁰Ndatsilil'la okhusubila, kata olwa ndali okhuboola “Ndubuywe tubu,”

¹¹kata olwa ndali noburi ma nimboola, “Abulaho owanyala okhusubila.”

¹²Nisina esia nyala okhuhaana khu MWAMI, khulwa obulahibwe bwosi khu ise?

¹³Nambane omusango kwewaini khu MWAMI, okhumukhupila embwo khulwa okhumbonia.

¹⁴Imbeli wabandu bosi namuhelesia esia ndamusubisia.

¹⁵Nobululu okhusila khu MWAMI olwa mulala khubandube afwitsanga.

¹⁶Ise ndi omurumikhiliwo, OMWAMI, khurumikhilanga ibe, singa obwa mama wanje yakhurumikhila. Ibe wambinia mulufu.

¹⁷Ndakhakhuhe omusango kwokhukhupa embwo, nimbana amasaayo kanje khuibe.

¹⁸Imbeli womukanda kwabandu bosi, mu Hekaluyo inzienukhu mu Yerusalemu nakhuhelesia esia ndakhusubisia. OMWAMI yetsoomibwe!