Read lunyore ETSISABURI 118 Bible Online

ETSISABURI 118 - lunyore bible

ETSISABURI 118

¹Mukhupile OMWAMI embwo sichila ye nomulahi, khandi obuyanzibwe nobweinziayo.

²Abandu ba Isiraeli baboole, “Obuyanzibwe nobweinziayo.”

³Abesaalisi ba Nyasaye baboole, “Obuyanzibwe nobweinziayo.”

⁴Abandu bosi abamwekayakayanga baboole “Obuyanzi bwe nobweinziayo.”

⁵Musibi sianje ndali okhulanga khu MWAMI; yangalusia ma niyakhola omulakhuule.

⁶OMWAMI ali halala n'nase, sindakharia tawe; omundu wosi yakhakhol'la sina?

⁷OMWAMI niye oukhonyel'langa, nase nandole abasuku banje nibalekelwe.

⁸Nobulahi okhusubila mu MWAMI, okhuyomba okhweleta khubandu.

⁹Nobulahi okhusubila mu MWAMI, okhuyomba okhweleta khubakhongo besibala.

¹⁰Abasuku abenji bali okhufumbila, nebutswa ndabamulula mutsingufu tsio MWAMI!

¹¹Bafumbila tsimbeka tsiosi, nebutswa ndabamulula mutsingufu tsio MWAMI!

¹²Banzitsulakhwo singa tsinzukhi, nebutswa bahia bwangu singa omul'lo kusambanga amahwa; mutsingufu tsio MWAMI ndali okhubamulula.

¹³Ndali okhuseerwa bululu ma ndali nindekel'lwanga, nebutswa OMWAMI yakhonya.

¹⁴OMWAMI yambetsanga obunyali niyangufuhasia, ye yali okhusoola.

¹⁵Hulile amayoosi amalahi kobulechi mumaheema kabandu ba Nyasaye: “Obunyali bwo MWAMI obwokhuchenyia nibwo obukakhol'le!

¹⁶Obunyalibwe bwakhunyool'la obulechi, obunyalibwe obukali mubulwani!”

¹⁷Sindakhafwe tawe; nebutswa ndakhabe mwoyo okhubool'la abandu ako MWAMI yakhola.

¹⁸Yambelesia esinyasio esikali okhusila, nebutswa siyaindekha fwe tawe.

¹⁹Munzikul'le esilibwa sie mu Hekalu; nanyinjilemwo nikhupila OMWAMI embwo!

²⁰Yisi nesilibwa sio MWAMI; abatsienukhu bonyene nibo abalenjilamwo.

²¹Khufumianga ibe, OMWAMI sichila wali okhumbulila, sichila umbeye obulechi.

²²Lichina liabombokhi basuula, eliene yilio likwiye eliobukhonyi obukali khunyumba.

²³Ling'ana yili liakholwa nende OMWAMI; mako obwa lili lilahi okhuhengakhwo!

²⁴Lino nelitukhu liobulechi bwo MWAMI; chende khusangale nikhukhupa ebikalakala!

²⁵Okhusoole OMWAMI, okhusoole! Okhuhelesie ikhabi indahi!

²⁶Nyasaye alaame ikhabi khu uyo owitsanga muliira lio MWAMI! Khukhulaamilanga ikhabi okhurula mu Hekalu yo MWAMI!

²⁷OMWAMI ni Nyasaye, abetsanga owetsimbabasi khu ifwe. Bukule tsisaka mumakhono kenywe, ma muchaake okhukhola omulukha, nimubotokhana olusambwa.

²⁸Ibe ni Nyasaye wanje, nase khukhupilanga embwo; namboolenje khukobukhongo bubwo khubandu.

²⁹Khupile OMWAMI embwo sichila ye nomulahi, ne obuyanzi bwe nobweinziayo.