Read lunyore ETSISABURI 119 Bible Online

ETSISABURI 119 - lunyore bible

ETSISABURI 119

¹Nabeikhabi yabo ababula esikha mubulamu bwabwe, khandi abamenyanga okhulondokhana ne lilako lio MWAMI.

²Nabeikhabi yabo abalondanga amalakoke, abamuhulilanga nomwoyo kwabwe kwosi.

³Sibakholanga obusiamu bwosi tawe; bachendanga mutsinjila tsio MWAMI.

⁴E OMWAMI! Ibe wakhuha amalako kaako, nokhubool'la mbu khukakhole mubusubilwa.

⁵Ndi nobunaayi mbu nambe omusubilwa mukhulinda amebaalo kaako.

⁶Nimba nireka esirwi khumalako kaako, khe sinasimbe omurwe tawe.

⁷Olwa siekanga obukhalachibwo obwahabwene, nakhwitsoomie nomwoyo omusiyikhu.

⁸Nafumile amalako kaako, orakhupa omukongo tawe!

⁹Omubuukha yakhasiiya mbwena obulamu bubwe? Khulwa okhulonda amalako kaako.

¹⁰Nomwoyo kwanje kwosi ndeemanga okhukhurumikhila; oralekha khol'le amalako kaako esikala marwi tawe.

¹¹Mbikhanga lilako lilio mumwoyo kwanje, kho mbule okhukhwonela.

¹²Khufumianga, E OMWAMI; unzibaal'le tsinjila tsitsio.

¹³Namboole khandi butinyu ningalukhilamwo mumalako aka wahaana.

¹⁴Sangalanga okhulonda amalako kaako, okhuyomba okhunyoola emiandu eminji.

¹⁵Ndenasianga amebaalo kaako; mengelesianga obwibaali bubwo.

¹⁶Sangalanga mumalako kaako; amalako kaako sindikebil'la tawe.

¹⁷Ukhol'le obulahi, ise omurumikhili uwo, kho mbe onyala okhumenya ninonda amebaalo kaako.

¹⁸Wikule tsimoni tsianje, khe mbe onyala okhulola, obwatooto bwamakana mwilako lilio.

¹⁹Ndi hano khusibala khulwo oluhono lutititi; orabisa amalako kaako okhurula khu ise tawe.

²⁰Omwoyo kwanje kunzunanga khulwe elienya; nyenyanga manye obukhalachi bubwo amatukhu kosi.

²¹Ibe ochayanga abekhonyi; nabesilaamo esibi yabo abakholanga esikala marwi khumalako kaako.

²²Umbinie khumanyeko kabwe nende inzekhelesi, sichila nondanga amalako kaako.

²³Abaami bakaananga nibasiemana okhunzira, nebutswa ise nandenasie amebaalo kaako.

²⁴Amebaalo kaako kasangasinjia okhusila, niko obuchetsiyi bwanje.

²⁵Ngonanga mulukuukhi nindelekele; usisimule singa walaka.

²⁶Ndeyama kosi aka ndakhola, nawe wali okhungalusia; unzibaal'le tsinjila tsitsio.

²⁷Ukhonye manyilisie amalako kaako, ne nanganil'le khumebaalo kaako amalahi.

²⁸Esibeela sinzir're; ungufuhasie, singa obwa walaka.

²⁹Oralekha nzie khunjila imbi tawe, ne mubulahi bubwo unzibaal'le lilako lilio.

³⁰Nzahuye mumwoyo kwanje okhuba omuhulili, rekelesianga khubukhalachi bubwo.

³¹Mal'le okhulonda amebaaloko, OMWAMI; oralekha simbe omurwe tawe.

³²Nafumile amalako kaako butinyu, sichila naumbelesie okhumanyilisia.

³³OMWAMI, unzibaal'le esifune siamalako kaako, nase nangafumile amatukhu kosi.

³⁴Unyinoosie lilako lilio, nase nandifumile; nandilinde nomwoyo kwanje kwosi.

³⁵Unzemel'le khulwo khulonda amalako kaako, sichila muko nyoolanga obusangali.

³⁶Umbe linaaya liokhufumila amalako kaako, okhuyomba okhuba omuhinda.

³⁷Orandekha mbuyie amang'ana kobusilu tawe, ukhol'le obulahi, singa walaka.

³⁸Ohesie esiesuhosio khu ise, omurumikhili uwo, esiesuho esia wesuhila yabo abakhubulilanga.

³⁹Usoole khumanyeko aka ritsanga; obukhalachi bubwo nobulahi!

⁴⁰Naayanga okhufumila amalako kaako; umbelesie obulamu obuhia, okhuba ibe oli owatooto.

⁴¹Umanyie obwa wanyanza, OMWAMI, ma usoole okhulondokhana nelisubisio lilio.

⁴²Nilwo olwa ndakalusia yabo abanyekanga ise, sichila subilil'langa mwing'ana lilio.

⁴³Ukhonye mboole obwatooto tsinyinga tsiosi. Sichila obunaayi bwanje buli mu bukhalachi bubwo.

⁴⁴Khasotso nafumilenje lilako lilio, buli khase na khase.

⁴⁵Namenyenje mubulakhuule obuhesikhu, sichila ndeemanga okhufumila amebaalo kaako.

⁴⁶Nandie amalako kaako khubaruchi, ne sinasimbe omurwe tawe.

⁴⁷Nyanzanga okhufumila amalako kaako, sichila ndakhuyanza.

⁴⁸Nyanzanga nimbana oluyali khumalako kaako; nanganil'lenje khumebaalo kaako.

⁴⁹Witsul'le aka wali okhusubisia ise omurumikhili uwo; kambelesianga obunaayi.

⁵⁰Kata mukhukhupa esibi ndali okhuhotselesibwa, sichila lisubisio lilio liali okhumba obulamu.

⁵¹Abekhonyi bakhol'langa inzekhelesi, nebutswa sili okhurula khwilako lilio.

⁵²Nzitsul'langa obukhalachi bubwo obwa khale muno, nabwo bunder'ranga obuhotselekhi E OMWAMI.

⁵³Olwa ndolanga abasiamu nibafunaka lilako lilio, nzitsulanga nelirima.

⁵⁴Mumatukhu kobulamu bwanje bwokhusibala obwimbichiti, ngulukunzanga tsinyembo khukamalako kaako.

⁵⁵Mubutukhu, khwitsul'langa ibe OMWAMI, ninganil'la khumalakokako.

⁵⁶Nyanzanga mumwoyo kwanje mukhuhesia amalako kaako.

⁵⁷E OMWAMI, niwe wenyene owanyenyanga; ndesuhanga okhufumila amalako kaako.

⁵⁸Khurebanga nomwoyo kwanje kwosi, okhumbela tsimbabasi singa wali okhundaka.

⁵⁹Mal'le okhuhenga ifwo yanje, ne ndesuhanga okhulonda amebaalo kaako.

⁶⁰Sila okhusisil'la ndeyungianga okhufumila amalako kaako.

⁶¹Ababi bar'rechekhela omubero, nebutswa ise sinzibil'langa lilako lio tawe.

⁶²Mubutukhu hakari mbukhanga, okhukhufumia khulwo bukhalachi bubwo obwatooto.

⁶³Ndi omulina we yabo bosi abakhurumikhilanga, owe yabo bosi abafumilanga lilako lilio.

⁶⁴OMWAMI, esibala siayitsulamwo obuyanzibwo oburalilu; unzibaal'le amalako kaako.

⁶⁵Ibe wahesia Lisubisio lilio, OMWAMI, ne oli omulahi khu ise, omurumikhili uwo.

⁶⁶Umbelesie obuchesi nende obumanyi, sichila subilanga amalako kaako.

⁶⁷Nosili okhumba esinyasio, ndakholanga obubi, nebutswa luno fumilanga ling'ana lilio.

⁶⁸Mako obwa oli omulahi khandi obwa oli owetsimbabasi! Unzibaal'le amalako kaako.

⁶⁹Abandu abekhonyi baboola obubehi khu ise, nebutswa nyanzanga lilako lilio nomwoyo kwosi.

⁷⁰Abandu yabo babula limanyilisia, nebutswa ise nyanzanga lilako lilio.

⁷¹Esinyasio siandahebwa siali esilahi khu ise, sichila siachila ninzeka amalako kaako.

⁷²Lilako elia wahaana neliobuha obukali khu ise, okhuyomba amapesa kosi musibala.

⁷³Ibe wali okhunonga, khandi unindanga mumulembe; umbelesie limanyilisia, kho mbe onyala okhweka amalako kaako.

⁷⁴Yabo abakhuhetsanga oluyali balayanza olwa bandola, sichila subilanga mumasubisio kaako.

⁷⁵Manyile mbu obukhalachibwo bwosi nobwatooto, OMWAMI, khandi mbu wambelesia esinyasio sichila ibe oli omusubilwa.

⁷⁶Lekha obuyanzibwo oburalilu bumbotselesie, singa wali okhusubisia, ise omurumikhiliwo.

⁷⁷Umbeele tsimbabasi, nase ndakhaba mwoyo, sichila nyanzanga lilako lilio.

⁷⁸Abekhonyi basimbe emirwe khulwa okhunzaala sila esikha, nebutswa ise nanganil'le khumebaalo kaako.

⁷⁹Lekha yabo bosi abakhuhetsanga oluyali betse khu ise, khandi nende yabo bosi abamanya amalako kaako.

⁸⁰Nase mbe omuhesikhu mukhukhola amalako kaako, ma mbinibwekhwo es'simba murwe siokhulekwa.

⁸¹Mal'le okhutoha, OMWAMI, ne nindil'langa umbonie; retsanga obusubili bwanje mwing'ana lilio.

⁸²Tsimoni tsianje tsichonyele khulwo okhulindil'la amasubisio kaako; olwa sireeba, “Naumbabine line?”

⁸³Mbula obukhonyi singa emitata chiewaini echiarandukha; nebutswa sili okhwibil'la amalakoko tawe.

⁸⁴Nindil'le okhwola oluhono sina? Nohelesie yabo abakhupianga esibi lina?

⁸⁵Abandu abekhonyi, abaralondanga amalako kaako, banzabiye obuko bwokhumbera.

⁸⁶Amalako kaako kosi namalunji; abandu bakhupianga esibi nibaboola obubehi ukhonye!

⁸⁷Bali ahembi okhundekel'la ma banzire, nebutswa sili okhuchaaya amalako kaako.

⁸⁸Olinde obulamu bwanje khulwa obuyanzibwo oburalilu, kho nase fumile amalako kaako.

⁸⁹Ling'ana lilio E OMWAMI, lilahindila inziayo; neliokhuhindila mwikulu.

⁹⁰Obusubilwabwo buhindilanga mutsinzibulo tsiosi, wabiikha esibala mung'ono ma silimwo.

⁹¹Ebindubio bihindilanga okhwola leelo khulwe lilako lilio; sichola biosi nebirumikhila bibio.

⁹²Lilako lilio lilaba nilirayimbelesia obusangali, khane ndafwila mukhunyakhana khwanje.

⁹³Sili okhuchaaya amebaalo kaako, sichila muko ukholanga okhuba mwoyo.

⁹⁴Ise ndi ouwo — usoole! Ndemanga okhufumila amalako kaako.

⁹⁵Abandu babi balindil'langa okhunzira, nebutswa nanganil'le khumalako kaako.

⁹⁶Ndabeye okhweka mbu siesindu siosi sili nobuleemu, nebutswa lilako lilio nelihesikhu.

⁹⁷Ndayanza lilako lilio okhusila, ndikanil'langakhwo om'basu kwosi.

⁹⁸Amalako kaako kali n'nase tsinyinga tsiosi, ne kakholanga okhuba omuchesi okhuyomba abasuku banje.

⁹⁹Ndi nokhumanyilisia okhubira okhwabebaali banje bosi, sichila nganil'langa khumebaalo kaako.

¹⁰⁰Ndi nobuchesi obukhongo okhubira abasakhulu, sichila fumilanga amalako kaako.

¹⁰¹Ndalekhana neifwo imbi, sichila nyenyanga okhulonda ling'ana lilio.

¹⁰²Sili okhuchaaya amebaalo kaako, okhuba ibe omwene niwe omwibaali wanje.

¹⁰³Mako obwa mebaalo kaako kali amabuulu okhukatsanzama, namelungu okhubira obukhi.

¹⁰⁴Nyoolanga obuchesi mumalako kaako, ne khulwako mbihil'lwanga ifwo imbi yosi?

¹⁰⁵Ling'ana lilio netaya yokhunzemel'la, khandi nobulafu khunjila yanje.

¹⁰⁶Nambesie akokhwesuha khwanje khu MWAMI, okhulonda amebaaloko amalunji.

¹⁰⁷OMWAMI, okhunyakhana khwanje nokhubi okhusila; umbe obulamu singa obwa wandaka.

¹⁰⁸Ouchil'le okhusaaya khwanje khwokhukhupa embwo Ee OMWAMI, ma unzibaal'le amalako kaako.

¹⁰⁹Khasotso nderechekhanga okhusaalila, sili okhwibil'la lilako lilio.

¹¹⁰Abandu babi barekanga nomubero, nebutswa sili okhufunakakhwo amalako kaako.

¹¹¹Amalako kaako nobulame bwanje obweinziayo; kali obusangali mumwoyo kwanje.

¹¹²Mal'le okhukhalaka okhulonda amalako kaako okhwola olwa ndifwa.

¹¹³Mbihil'lwanga yabo abarelelanga khuibe kupu, nebutswa nyanzanga lilako lilio.

¹¹⁴Ibe oli omusooli wanje khandi omulindi wanje, retsanga obunaayi bwanje mwisubisio lilio.

¹¹⁵Rule khu ise, inywe abandu aboni, Ise ndafumila amalako ka Nyasaye wanje.

¹¹⁶Umbelesie tsingufu singa wali okhusubisia, nase nambe mwoyo; oralekha ndesikoka mubunaayi bwanje tawe!

¹¹⁷Undile, nase ndaba mumulembe, ne ndalarechelesianga amalako kaako.

¹¹⁸Ibe osuulanga siomundu wosi ofunakanga amalako kaako; Obuloosie bwabwe bwobukaati nobukhaya.

¹¹⁹Ibe obalanga ababi bosi singa amakokha, ma kho ise nyanzanga amebaalo kaako.

¹²⁰Khulwe ibe ndi noburi; Nzitsuye noburi khulwo obukhalachi bubwo.

¹²¹Mal'le okhukhola amalunji khandi amalahi; orandekha khubasuku banje tawe!

¹²²Usubisie mbu naukhonye, ise omurumikhili uwo; oralekha abandu abekhonyi basandie tawe!

¹²³Tsimoni tsianje tsichonyele okhulindil'la obukhonyibwo bwokhumbonia; obununuli obwa wali okhundaka.

¹²⁴Ukhol'le okhuhelana nende obuyanzi bubwo oburalilu, ma unzibaal'le amalako kaako.

¹²⁵Ndi omurumikhili uwo; umbelesie okhumanyilisia, kho manye amebaalo kaako.

¹²⁶OMWAMI, inyinga yiyo yokhuhaana esinyasio yool'le, sichila abandu bafunakanga lilako lilio,

¹²⁷ndayanza amalako kaako okhuyomba efetsa, okhuyomba efetsa iseletse.

¹²⁸Ma kho nondanga amebaalo kaako kosi; ndasula tsinjila tsisiamu tsiosi.

¹²⁹Amebaalo kaako nakokhuhuka; ngafumilanga nomwoyo kwanje kwosi.

¹³⁰Obwinoosi bwamebaalo kaako buhananga obulafu, khandi buleranga obuchesi khumuhingwa.

¹³¹Mubuyanzi bwanje khumalako kaako, mbelananga bwangu nomunwa omwalamu.

¹³²Ungalukhile ma umbeele tsimbabasi, singa okhol'langa bosi abakhuyanzanga.

¹³³Singa wali okhundaka, uninde rakhakwa tawe; oralekha obubi bunyembel'le tawe.

¹³⁴Usoole khu yabo abasandianga, kho mbe onyala okhufumila amalako kaako.

¹³⁵Unaamile ikhabi khulwa okhubaho khukhwo, ma unzibaal'le amalako kaako.

¹³⁶Amasika kanje kasundukhanga singa amaatsi komuchela, sichila abandu sibafumilanga lilako lilio tawe.

¹³⁷Ibe oli omulunji, OMWAMI, ne amalako kaako namalunji.

¹³⁸Amalako aka wahaana, kosi namalahi khandi amalunji.

¹³⁹Lileko lianje liatukhanga mwise singa omul'lo, sichila abasuku banje bachaayanga amalako kaako.

¹⁴⁰Lisubisio lilio neliatooto! Mako obwa ndaliyanza!

¹⁴¹Ise sindi esindu tawe khandi njaywanga, nebutswa sinjiayanga amebaaloko tawe.

¹⁴²Obulunji bubwo bulahindila inziayo, ne lilako lilio libetsanga eliatooto khasotso.

¹⁴³Ndi nomunyakhano omwinji nende esihenda mwoyo, nebutswa nyoolanga obusangali mumalako kaako.

¹⁴⁴Amebaalo kaako kabetsanga amalunji khasotso, umbelesie okhumanyilisia nase nambe mwoyo.

¹⁴⁵Nanganga khuibe nomwoyo kwanje kwosi, ungalusie OMWAMI, nase nanonde amalako kaako!

¹⁴⁶Nanganga khuibe; umbonie, nase nafumile amalako kaako.

¹⁴⁷Isi neralabulukha nanganga khuibe ukhonye; retsanga obunaayi bwanje mwisubisio lilio.

¹⁴⁸Obutukhu bwosi mbetsanga meso, okhukanil'la khumebaalo kaako.

¹⁴⁹Khulwa mbu obuyanzibwo noburalilu, umbulile Ee OMWAMI; Omanyie tsimbabasitsio ma olinde obulamu bwanje!

¹⁵⁰Abasandi banje abalulu besundanga ahandi, abandu abaralondanga lilako lilio.

¹⁵¹Nebutswa ibe obetsanga ahembi n'nase, OMWAMI, ne amalako kaako kosi nakeinziayo.

¹⁵²Khale muno ndali okhweka amalako kaako; ibe wakakhola okhuhindila inziayo.

¹⁵³Henga khusibi sianje ma umbonie, sichila sili okhuchaaya lilako lilio tawe.

¹⁵⁴Usoole ma ukhole omulakhuule; umbonie, singa wali okhusubisia.

¹⁵⁵Ababi sibakhahonibwe tawe, sichila sibalondanga amalako kaako tawe.

¹⁵⁶Nebutswa tsimbabasi tsitsio OMWAMI, netsingali; omanyie tsimbabasitsio ma umbonie!

¹⁵⁷Abasuku banje nabenji nende abokhusandia, nebutswa sinzibil'langa okhulonda amalako kaako tawe.

¹⁵⁸Olwa menganga khubasiemani yabo, omwoyo kwanje kwitsulangamwo oburima, sichila sibafumilanga amalako kaako tawe.

¹⁵⁹Lola singa ndayanza amebaalo kaako OMWAMI. Obuyanzibwo sibukalukhananga tawe; kho umbonie.

¹⁶⁰Es'sina sie Lilako lilio liosi nobwatooto, ne obukhalachibwo obwatooto bwosi nobweinziayo.

¹⁶¹Abandu abakufu banyinjil'langa sila esikha, nebutswa ise mbananga oluyali khwilako lilio:

¹⁶²Nyanzile khulwa amasubisio kaako, singa omundu osangalanga olwa anyooye obuhinda obwinji.

¹⁶³Mbihil'lwanga ninjaaya obubehi bwosi, nebutswa nyanzanga lilako lilio.

¹⁶⁴Hali khane nakhataru sielitukhu khukhupilanga embwo, sichila obukhalachi bubwo nobwatooto.

¹⁶⁵Yabo abayanzanga lilako lilio banyoolanga obulindi obulahi, ne sibulaho esiakhachila bakwe.

¹⁶⁶Nindil'langa khuibe OMWAMI mbu umbonie, kholanga amalako kaako.

¹⁶⁷Nondanga amebaalo kaako; ndakayanza nomwoyo kwanje kwosi.

¹⁶⁸Nondanga amachetsiyio kaako; ibe ololanga kosi aka kholanga.

¹⁶⁹Lekha okhusaaya khwokhusaba obukhonyi bwoole khuibe, OMWAMI! Umbelesie okhumanyilisia singa wandesuhila.

¹⁷⁰Ohulilisie okhusaaya khwanje, ma umbonie singa wali okhundesuhila!

¹⁷¹Nakhwitsoomie amatukhu kosi, sichila unzibaal'langa amalako kaako.

¹⁷²Nanyembenje khukamalako kaako, sichila amalako kaako namalunji.

¹⁷³Obetsenje secheli okhukhonya, sichila nondanga amalako kaako.

¹⁷⁴Mako obwa ndekombanga obuhambinibwo, E OMWAMI! Nyoolanga obusangali mwilako lilio.

¹⁷⁵Umbelesie obulamu mbu nase khwitsoomie ibe; amalako kaako kakhonye ise.

¹⁷⁶Njendananga iyi ne iyi singa likondi eliakora, kho witse ukhaabe ise omurumikhili uwo, sichila sili okhulekha amalako kaako.