Read lunyore ETSISABURI 135 Bible Online

ETSISABURI 135 - lunyore bible

ETSISABURI 135

¹OMWAMI yetsoomibwe! Mufumie eliira lilie, inywe abarumikhilibo MWAMI,

²inywe abasinjilanga munyumba yo MWAMI, mu Hekalu ya Nyasaye wefwe.

³Mwitsoomie OMWAMI, sichila ye nomulahi; mumwembele nimumwitsoomia, sichila nowetsimbabasi.

⁴Yela Yakobo abe owuwe, ne abandu ba Isiraeli babe abaabe omwene.

⁵Manyile mbu OMWAMI wefwe nomukhongo, okhuyomba abanyasaye bandi bosi.

⁶Akholanga liosi elia yenyanga mwikulu nende khusibala, mutsinyanza nende mutsindungu mukari.

⁷Aleranga amalumbesi keikhumatsi okhurula khusihesi siesibala; alombanga oluheni khulwe ikhumaatsi, ne aleranga obusindu okhurula musiachi sieinyumbaye.

⁸Yali okhwira abekulanda bosi be Misiri, abesiani kata nende abemiruko khandi.

⁹Ebwene yiyo yakholaho akamangalimwa nende akokhuchenya, okhuhaana esinyasio khumuruchi nende abemelibe bosi.

¹⁰Yamuma abasuku abenji, ma niyeera abaruchi bobunyali.

¹¹Sihoni, omuruchi wa Baamori, Ogu, omuruchi wa Bashani, nende abaruchi bosi mu Kanaani.

¹²Yahaana esibala siabwe khubandube; yabahaana khu Isiraeli.

¹³OMWAMI, ibe wakhamanyikhenje khasotso singa Nyasaye; tsinzibulo tsiosi tsiakhakhwitsul'le ibe.

¹⁴OMWAMI alasoola abandu baabe; alabelel'la abarumikhili baabe.

¹⁵Abanyasaye bamahanga balombwanga khu efetsa nende etsahabu; balongwanga namakhono kabandu.

¹⁶Bali neminwa, nebutswa sibanyala khul'loma tawe, bali netsimoni, nebutswa sibanyala okhulola tawe.

¹⁷Bali namarwi, nebutswa sibanyala okhuhulila tawe, kata sibanyala okhuhelana emiiya tawe.

¹⁸Lekha yabo bosi ababalomba nende abasubilanga mubo, babe singa ebiniini ebia abene belombele!

¹⁹Mwitsoomie OMWAMI inywe abandu ba Isiraeli, mumwitsoomie inywe abesaalisi ba Nyasaye!

²⁰Mwitsoomie OMWAMI, inywe Abalawi; mumwitsoomie, inywe mwesi abamwekayakayanga!

²¹Mwitsoomie OMWAMI mu Sayuni, mu Yerusalemu, ingo uwe. OMWAMI yetsoomibwe!