Read lunyore ETSISABURI 136 Bible Online

ETSISABURI 136 - lunyore bible

ETSISABURI 136

¹Khupile OMWAMI embwo sichila ye nomulahi; obuyanzibwe nobweinziayo.

²Mukhupe embwo khumukhongo wabanyasaye bosi, obuyanzibwe nobweinziayo.

³Mukhupe embwo khumukhongo wabaami bosi, obuyanzibwe nobweinziayo.

⁴Ye yenyene akholanga akamangalimwa; obuyanzibwe nobweinziayo.

⁵Khulwo buchesibwe omwene yalomba likulu, obuyanzibwe nobweinziayo;

⁶Yombokha esibala khumaatsi katsia olutungu, obuyanzibwe nobweinziayo.

⁷Yalomba eliuba nende omwesi, obuyanzibwe nobweinziayo;

⁸eliuba okhwakha mumubasu; obuyanzibwe nobweinziayo;

⁹Omwesi nende tsinyininyini okhwakha mubutukhu, obuyanzibwe nobweinziayo.

¹⁰Yere abasiani ba Bamisiri bambeli; obuyanzibwe nobweinziayo.

¹¹Yahinia Isiraeli Emisiri, obuyanzibwe nobweinziayo;

¹²nobunyali bwomukhonokwe, nende obunyalibwe omwene; obuyanzibwe nobweinziayo.

¹³Yakabukhania Inyanza inzakhanyu, obuyanzibwe nobweinziayo;

¹⁴nabisisiamwo abandu baabe, obuyanzibwe nobweinziayo;

¹⁵nebutswa yalekha amaatsi nikayila omuruchi we Misiri nabasikaribe, obuyanzibwe nobweinziayo.

¹⁶Yabisisia abandube musitsiimi, obuyanzibwe nobweinziayo.

¹⁷Yera abaruchi bobunyali, obuyanzibwe nobweinziayo;

¹⁸yera abaruchi beifuma ingali, obuyanzibwe nobweinziayo;

¹⁹Sihoni omuruchi wa Baamori; obuyanzibwe nobweinziayo;

²⁰nende Ogu, omuruchi wa Bashani, obuyanzibwe nobweinziayo.

²¹Yahaana ebibala biabwe khubandube; obuyanzibwe nobweinziayo;

²²Yabihaana khu Isiraeli omurumikhili uwe; obuyanzibwe nobweinziayo.

²³Siyakhwibil'la olwa khwali okhulekwa tawe; obuyanzibwe nobweinziayo;

²⁴yakhununula okhurula khubasuku befwe, obuyanzibwe nobweinziayo.

²⁵Ahaananga ebiokhulia khubilonje biosi; obuyanzibwe nobweinziayo.

²⁶Khupile Nyasaye womwikulu embwo, obuyanzibwe nobweinziayo.