Read lunyore ETSISABURI 139 Bible Online

ETSISABURI 139 - lunyore bible

ETSISABURI 139

¹E OMWAMI, ibe waimengelesia ma waimanya.

²Wamanya kosi akakholanga; okhurula ehale bwene ibe omanyilisianga amakani kanje kosi.

³Ibe undolanga; kata nimba nikholanga emilimo nohomba nimbulukhanga; Ibe wamanya ebikhole bianje biosi.

⁴Kata nisili okhul'loma, Ibe umal'le okhumanya aka nzia okhuboola.

⁵Ibe umbotokhananga tsimbeka tsiosi, usoolanga nobunyali bubwo.

⁶Obumanyi bubwo khu ise nobweyinikhu okhusila; sindi onyala okhubumanyilisia tawe.

⁷Ndakhatsia hena okhwebisa okhurula khuibe? Ndakhelukhile hena mbu rule imbeli uwo?

⁸Nimba ninzia mwikulu, ibe oliho; nimba ninzia emakombe, oliho.

⁹Nimba nimbulukha singa linyonyi okhutsia ehale, okhubira ebukwe nohomba okhumenya emasaba ehale,

¹⁰ibe oli ebwene yiyo okhunyemel'la, ibe oli ebwene yiyo okhumbabina.

¹¹Ndakhareebele esiilima okhumbisa, nohomba obulafu obukhosianga hosi bukwe obutukhu,

¹²nebutswa kata esilima sisili obumwamu khuibe tawe, ne obutukhu bwakhanga butswa singa om'basu. Esiilima nende obulafu bifwanana khuibe.

¹³Ibe walonga siesimo siomubili kwanje; wanyongania nisili munda mwamama wanje.

¹⁴Khufumianga sichila ibe oli owokhuribwa; kosi akokholanga namahuko khandi akokhuchenya. Ise ngamanyile nomwoyo kwanje kwosi.

¹⁵Olwa amakumba kanje kali nikalombwanga, nikonganibwanga obulahi bwene munda mwa mama wanje, olwa ndali nikhul'langamwo mumabiswi, wali okhumanya mbu ndimwo,

¹⁶wandola nisili okhwibulwa. Amatukhu akandarechekhelwa kosi kali nikahandikwa musitapu sisio, kata elala khuko nilisili okhuchaaka.

¹⁷E Nyasaye, amapaaloko nakobukusi obukali khuise; namenji okhusila muno.

¹⁸Nindakhakabal'le kakhabeye amenji okhubira omuyekhe. Olwa mbukhanga mundoolo, mbetsanga nisili n'nawe.

¹⁹E Nyasaye, mako obwa ndekombanga mbu wire abasiamu! Mako obwa ndekombanga abandu beindiri barule khu ise!

²⁰Baboolanga amang'ana amabi khuibe; banyekanga eliira lilio.

²¹E OMWAMI, ise mbihil'lwanga yabo abakhubihil'lwanga ibe. Njaayanga yabo abakhukhol'langa indiri.

²²Mbabihil'lwanga nokhubihil'lwa khwa kupu. Mbabukulanga okhuba abasuku banje.

²³Umengelesie E Nyasaye ma omanye inganakani; undeeme ma omanye tsinganakani tsianje.

²⁴Orunilisie nikakhaba obubi bwosi bulikhwo mwise, ma unyemel'le munjila yeinziayo.