Read lunyore ETSISABURI 144 Bible Online

ETSISABURI 144 - lunyore bible

ETSISABURI 144

¹OMWAMI omusooli wanje yetsoomibwe! Yanzechesianga obwo khulwana niyarechekha khulwe lihe.

²Ye nomusooli wanje khandi omulindi wanje, ye nobwikamilo bwanje khandi omuhonia wanje, owasubilangamwo khulwo omulembe. Aretsanga amahanga hasi wobunyali bwanje.

³OMWAMI, omundu ali sina owe ibe omanyilisianga, omundu namundu butswa niye owohendelanga?

⁴Ali butswa singa omuya kwobusindu, amatukhuke kali singa esiniini esibiranga.

⁵E OMWAMI, yikula likulu ma wikhe hasi; otiile khubikulu, nabio bilatuma omwosi.

⁶Ruma tsimbeni ma osalanie abasuku baabo; lasa tsisele tsitsio ma tsibelusie.

⁷Yikha hasi okhurula ikulu, ukhwese okhurula mumaatsi akatsia olutungu ma umbabine; umbonie khubunyali bwabandu abacheni,

⁸abaranyala okhuboola akatooto, nibabeha kata musiesuho.

⁹Nakhwembele olwembo oluhia, E Nyasaye; ndakhupa lilele ma khwembele.

¹⁰Ibe ohaananga obulechi khubaruchi, ma omuhabina omurumikhili uwo Daudi.

¹¹Umbonie khubasuku banje abalulu; umbonie khubunyali bwabandu abacheni, abaranyala okhuboola akatooto nibabeha kata musiesuho.

¹²Abasiani befwe mububuukha bwabwe, babe singa ebiraakwa ebikhulanga mutsingufu. Abakhaana befwe babe singa etsisiilo tsioburuchi, etsisiahanga etsikona tsiehango homuruchi.

¹³Ebiachi biefwe bitsule tu, bibemwo nebiraakwa tsimbila tsiosi. Amakondi kefwe kebul'le ebimeme etsielefu amakhumi, mumikunda chiefwe.

¹⁴Tsing'ombe tsiefwe tsibulane mubwinji, sila okhulokosa kata okhukosia ebimoosi tawe. Tsindekhuulu tsirahulilikha mumihanda tsiefwe tawe.

¹⁵Nelieikhabi lihanga yilio eliekano kalimwo; nabeikhabi abandu yabo aba Nyasaye wabwe ali OMWAMI!