Read lunyore ETSISABURI 145 Bible Online

ETSISABURI 145 - lunyore bible

ETSISABURI 145

¹Naribule khukobukhongo bubwo, Nyasaye wanje khandi omuruchi wanje; Nakhukhupile embwo inziayo.

²Sielitukhu nakhukhupile embwo; Nakhwitsoomie inziayo.

³OMWAMI nomukhongo khandi owokhwitsoomibwa okhusila; obukhongobwe buyombele okhumanyilisibwa.

⁴Aka wakhola kalafumibwa okhurula khulwibulo l'lala okhwola khulundi; balaboola akemilimochio emikhongo.

⁵Balal'loma khukobukhongobwo nende oluyalilwo, ne nase nanganil'lenje khumilimochio echiokhuchenya.

⁶Abandu balal'loma khukemilimochio emikhongo, nase namboole khukobukhongo bubwo.

⁷Balaboola khukobulahi bubwo bwosi, nibemba khuketsimbabasi tsitsio.

⁸OMWAMI nowobuyanzi khandi nowetsimbabasi, orahambwanga noburima bwangu khandi owetsula nobuyanzi oburalilu.

⁹Ye nomulahi khubandu bosi, khandi ayanzanga bosi aba yalomba.

¹⁰Ebilonje bibio biosi OMWAMI nabikhwitsoomie, ne abandubo bosi nabakhukhupile embwo.

¹¹Balal'loma khukobukhongo bwobunyali bwo obwokhuhamba, nibaboola khuketsingufutsio,

¹²kho kachile abandu bosi bamanye emilimo tsitsio tsietsingufu, ne obunyali obukhongobwo bwami bubwo.

¹³Okhwamihakhwo nokhwe inziayo, khandi obetsanga omuruchi inziayo. OMWAMI nomusubilwa khubiesuhobie, ne kosi aka akholanga namalahi.

¹⁴Akhonyanga yabo abali mumanyakhano; achinguulanga yabo abakwiye hasi.

¹⁵Ebili mwoyo biosi binayanga khuibe, nawe obihetsanga ebiokhulia ebia bitakhanga.

¹⁶Obihetsanga ebibihela nohesia elienya liabio bosi.

¹⁷OMWAMI nomulunji mu kosi aka akholanga, nowetsimbabasi mubikholebie biosi.

¹⁸Ali ahembi khu yabo abalanganga khuye, abalanganga khuye nomwoyo omusiyikhu.

¹⁹Ahaananga khu yabo abamufumianga biosi ebia batakhanga; ahul'langa okhulakaya khwabwe ma abahonia.

²⁰Asoolanga omundu wosi omuyanzanga, nebutswa alamuma ababi.

²¹Nafumienje OMWAMI khasotso; lekha ebilonje bibie biosi bifumie elir'ra lilie litsienukhu inziayo.