Read lunyore ETSISABURI 147 Bible Online

ETSISABURI 147 - lunyore bible

ETSISABURI 147

¹Nyasaye yetsoomibwe! Nobulahi okhwembela Nyasaye wefwe nikhumwitsoomia; Namakasu khandi amalunji okhumwitsoomia.

²OMWAMI yombokhanga Yerusalemu obuhia, Achelesianga abandu abahilwa mubuhambe.

³Ahonianga ababeleye mumioyo, naboha amafumire kabwe.

⁴Ye wahaana amabalo ketsinyininyini tsikhoyele okhubaho, ne alanganga sindala khutsio neliira liayo.

⁵OMWAMI wefwe nomukhongo khandi nomukufu; obuchesibwe sibunyala okhuchelwa tawe.

⁶Achinguulanga abetutuyi, nebutswa atubulanga ababi nibakwa olukhuukhi.

⁷Mwembele OMWAMI tsinyembo tsiokhwitsoomia, mukhupile Nyasaye wefwe obukhana khwilele.

⁸Afuunikhanga amalumbesi khwikulu; ahaananga ifula khusibala, nachila obunyasi okhumela khubikulu.

⁹Ahetsanga etsisolo ebiokhulia biatsio, khandi alisinjia amakhokho amatoro olwa kalakayanga khuye.

¹⁰Sayanzisibwanga nende etsisululi tsietsingufu, kata okhusangal'la abasikari balulu tawe;

¹¹Nebutswa asangal'langa yabo abamufumianga, mu yabo abasubilanga mubuyanzibwe oburalilu.

¹²Witsoomie OMWAMI, E Yerusalemu! Witsoomie OMWAMI, E Sayuni!

¹³Akufuhasianga ebilibwa bibio, ahaananga tsikhabi khubandu baabo.

¹⁴Aretsanga omulembe khumipaka chichio, nakhwikusia nende ingano indahi.

¹⁵Ahaananga lilako khusibala, ne akalakanga kekholanga bwangu.

¹⁶Abakalanga etsaluchi singa lipalangeti, nasalania ebarafu singa olukhuukhi.

¹⁷Arumanga ifula yamachina singa amachina amakali, abulaho owakhefwila obusindu bwa arumanga!

¹⁸Ma ahaana lilako, ne ebarafu ekhamulukha; aruma obusindu, ne amaatsi katsul'lukha.

¹⁹Ahaananga amang'anake khubandu ba Isiraeli, ne amebaaloke nende amalakoke khubandube.

²⁰Arakhol'lakhwo amahanga kandi akene yaka tawe, kho sikamanyile amalakoke tawe. OMWAMI yetsoomibwe!