Read lunyore ETSISABURI 148 Bible Online

ETSISABURI 148 - lunyore bible

ETSISABURI 148

¹OMWAMI yetsoomibwe! Mwitsoomie OMWAMI okhurula mwikulu inywe abamenyanga ikulu okhusila.

²Mumwitsoomie, abamalaika be bosi, nende amahe ke komwikulu kosi.

³Mumwitsoomie eliuba nende omwesi; mumwitsoomie, tsinyininyini etsiakhanga.

⁴Mumwitsoomie, amakulu keikulu okhusila, nende amaatsi ikulu welikulu.

⁵Bosi lekha betsoomie eliira lio MWAMI! Yalaka, ma biosi nibilongwa;

⁶Khulwe lilako lilie biarebwa mung'ono mwabio inziayo, ne sibinyala okhukhola esikala marwi tawe.

⁷Mumwitsoomie OMWAMI okhurula khusibala, etsisolo tsingali tsiomunyanza nende tsindungu tsiosi etsiemunyanza.

⁸Mumwitsoomie inywe tsimbeni nende amachina keifula, etsaluchi nende amalumbesi, omuyeka omukali okulondanga lilako lilie.

⁹Mumwitsoomie, ebikulu ebimbichiti nende ebirambi, emisaala chiamatunde nende emitsuru;

¹⁰etsisolo tsiosi etsiarukwa nende etsiom'bulimo, ebimoolanga nende amanyonyi.

¹¹Mumwitsoomie abaruchi nende abandu bosi, abalamilwa oburuchi nende Abaami bandi bosi;

¹²abakhaana nende abasiani, abasakhulu nende abaana bati bamwitsoomie khandi.

¹³Bosi betsoomie eliira lio MWAMI! Eliira lilie nelikhongo okhuyomba akandi kosi, obukhongo bubwe bubira ebibala nende likulu.

¹⁴Yakufuhasia lihanga lilie, kho abandu babe bosi bamwitsoomie, abandu ba Isiraeli, abayanzwabe. OMWAMI yetsoomibwe!