Read lunyore ETSISABURI 16 Bible Online

ETSISABURI 16 - lunyore bible

ETSISABURI 16

¹Uninde, E Nyasaye, okhuba nimwiwe omwa nzilukhilanga okhunyoola omulembe.

²Mbool'langa OMWAMI mbu “Ibe niwe OMWAMI wanje; ebindu biosi ebilahi ebiandi n'nabio birulanga khuibe.”

³Mako obwa abandu bo MWAMI abasubilwa bali nolukoosi olukali! Okhwesiaha khwanje okhukali khuli mubene yabo.

⁴Yabo abekayakayanga abanyasaye bandi beler'ranga esibi esikali. Ise sindasanga mukhuhana khwebihanwa biabwe tawe; sindakhekayakayakhwo abanyasaye babwe tawe.

⁵OMWAMI, Ibe obetsanga omukabwa kwanje omuseletse, khandi umbetsanga kosi akandakhanga, obulamu bwanje bwamatukhu ketsanga buli mumakhono kaako.

⁶Waikhalachila esitonye siomukunda esilahi okhusila, omukabwa okwa wambelesia nomulahi okhusila,

⁷Nzitsoomianga OMWAMI, sichila yanyemel'langa, ne mubutukhu omwoyo kwanje kunzibaal'langa.

⁸Retsanga OMWAMI Nyasaye imbeli wanje khasotso; sichila ali khumukhono khwanje mulunji, nase sindarisibwa tawe.

⁹Khulwako omwoyo kwanje kusangalanga nikutsatsahala, ndehul'langa okhuba nomulembe,

¹⁰sichila usoolanga okhurula khubunyali bwolufu, kata siolekhanga uyo oli omusubilwa khuibe musibala sie Makombe tawe.

¹¹Ibe olaamanyia injila yokhwinjila mubulamu; Okhulolekha khukhwo khumbetsanga obusangali, khandi khunyanzisianga amatukhu kosi.