Read lunyore ETSISABURI 17 Bible Online

ETSISABURI 17 - lunyore bible

ETSISABURI 17

¹E OMWAMI! Ohulile okhulakaye kwanje olwa runanga akahabwene; oreke amarwi khwisayo lianje elibula esikha.

²Olaakhalachila esiina okhulondokhana nobulunji bwanje, okhuba ibe wamanya akahabwene.

³Ibe wamanya omwoyo kwanje, unzitsiye mubutukhu; niurunilisia mumwoyo, ne sionyooye obwekombi obubi mwise tawe.

⁴Sin'nomanga obubi singa abandi bal'lomanga tawe, nondanga amalako kaako, ne sinondanga munjila tsiabandu beinduli tawe.

⁵Khasotso nondanga injila yiyo; kata sili okhuchilekhakhwo tawe.

⁶Nanganga khuibe, E Nyasaye, sichila ibe ungalusianga; orekie esirwi ma ohulile amang'ana kanje.

⁷Obisule obuyanzibwo obwokhuchenyia ma umbonie, hasibafu uwo soolwanga okhurula khubasuku banje.

⁸Uninde singa obwolindanga indol'lo yeimoniyo yene; umbise musiinikha sietsimbaha tsitsio

⁹okhurula khumakhupako kababi. Abasuku abalulu bambotokhan'ne;

¹⁰babula tsimabasi ne bal'lomanga nibatsalikha.

¹¹Babotokhan'ne tsimbeka tsianje tsiosi hosi ahasukhananga, barunanga obweyangu bwokhunumba hasi mumaloba.

¹²Bali singa etsisimba, etsindekonekhelanga, nitsienyenga okhuurandulania mubitonye.

¹³Witse, E OMWAMI! Olwane abasuku banje ma obaleke! Umbonie okhurula khubasiamu nolukanga lulwo.

¹⁴Umbonie okhurula khubekuru musibala sino. Obahe esinyasio siokhubachetsiyia esia wababikhila; abaana babwe banyoole khusinyasio yisio, khandi sisikal'lekhwo abaana babaana babwe!

¹⁵Nebutswa ise nakhulole, sichila mbula esikha; ne olwa mbuukhanga, okhulolekha khukhwo khumbetsanga obusangali.