Read lunyore ETSISABURI 18 Bible Online

ETSISABURI 18 - lunyore bible

ETSISABURI 18

¹Mako obwa ndakhuyanga OMWAMI! Ibe oli omusooli wanje.

²OMWAMI nomulindi wanje; noluhinga lwanje olutinyu. Nyasaye wanje nomulindi wanje, ne muye ndi nomulembe. Yasinganga singa esikhumba; yasoolanga khububi niyambelesia omulembe.

³Nanganga khu MWAMI, okwan'ne okhwitsoomibwa, nase nasoolwe khubasuku banje.

⁴Esibi siolufu siafumbel'la, ne ebikubuli biokhuumuma biali okhumbir'rakhwo.

⁵Esibi siolufu siambotokhana, ne esilindwa nisirechekhela omubero kwasio.

⁶Ndali okhulanga khu MWAMI nindi mumunyakhano; Ndali okhulanga Khu Nyasaye mbu yakhonye. Nali mu Hekalu yiye yahul'la omwoyo kwanje, yahul'la okhusaba obukhonyi khwanje.

⁷Ma esibala nisirenga khandi nisitechela, Emise chiebikulu nachio nichienuya khandi nichitechela, sichila Nyasaye yali nahambilwe nelirima.

⁸Omwosi kwatuuma okhurula mumolu kaake, Ne omul'lo nende amanda akatukhanga nikarula mumunwa kukwe.

⁹Yeekula likulu ma niyekha hasi, ne lilumbesi limwamu tititi liali isi webilenjebie.

¹⁰Yaniina khwikerubi[1] ma napulukha, ye yapulukha niyekhaye mumiiya.

¹¹Yebotokhoniakhwo esiilima, amalumbesi kamaatsi amamwamu t'ti nikamufumbila.

¹²Olwa yalolekha, obulafu bwakha, ifula yamachina nende amanda komulilo nikarula mwilumbesi limwamu titi.

¹³Ma OMWAMI niyanukha okhurula mwikulu, ne omwoyo okwe uyo Oweikulu Okhusila nikuhulilikha.

¹⁴Naye yalasa tsisele tsitsie nasalania abasuku baabe, yabelusia khulwo okhwaakha khwetsimbeni tsinyinji.

¹⁵Olwalo lweinyanza lwabakalwa habulafu, emise chiesibala chiafunulwa, olwe ibe OMWAMI wafukula abasuka baabo, ma nobakondokhela mwirima lilio.

¹⁶OMWAMI yeekha hasi okhurula mwikulu ma niyandiila; yakhwesa okhurula mulutungu lwamaatsi.

¹⁷Yaasoola okhurula khubasuku abakufu nende khuyabo abambihil'lwanga ise — bali abakufu ma nibanyembel'la.

¹⁸Olwa ndali mumunyakhano, banyinjil'la, nebutswa OMWAMI yali okhuusoola.

¹⁹Yakhonya okhurula musibi; yambonia sichila yali okhuusangal'la.

²⁰OMWAMI yambetsanga omukabwa sichila kholanga amalunji; yambetsanga ikhabi sichila sindi nesikha tawe.

²¹Mal'le okhulinda amalako ko MWAMI; ne sirul'le khu Nyasaye wanje tawe.

²²Mal'le okhukhola okhuhelana namalako kaake, ne simukholeye esikala marwi khumalako kaake tawe.

²³Ye umanyile mbu sindi omusiamu tawe, khandi sikholanga amabi tawe.

²⁴Khulwako yambetsanga omukabwa sichila kholanga amalunji. Okhuba ye wamanya mbu ise mbula esikha.

²⁵E OMWAMI, khu yabo abali abasubilwa ibe obetsanga omusubilwa khubo. Ne khu yabo abali abahesikhuibe obetsanga owetsimbabasi.

²⁶Ibe oli omusiyikhu khu yabo abali abasiyikhu, nebutswa oli omululu khubasiamu.

²⁷Ohonianga yabo abetutuyianga, nebutswa wisianga hasi abeloli.

²⁸E OMWAMI, ibe ukhosisianga obulafu, ohinianga esiilima sianje.

²⁹Umbelesianga tsingufu okhulwana abasuku banje, nende obunyali bwokhufunaka tsiminga tsiabwe.

³⁰Nyasaye uyu, injila yiye neyahabwene; lisubisio lilie linyoolekhanga okhuba eliatooto. Ali singa esikhumba khu bosi abelukhilanga muye.

³¹OMWAMI yenyene niye Nyasaye, khandi Nyasaye yenyene niye esiesingo siefwe.

³²Niye Nyasaye oungufuhasianga, nakhola injila yanje okhuba eyahabwene.

³³Ayiakalanga ebilenje bianje singa ebiebitsusu, niyasinjisia tili ikulu wesikulu esirambi.

³⁴Niye ounasianga okhulwana lihe, kho amakhono kanje kafumbe obuyingo bwomukasa.

³⁵E OMWAMI, usoolanga khandi umbonianga, obutendibwo bungalihisie, ne obunyalibwo bumbeye omulembe.

³⁶Ibe unindanga mbu ndekhe okhukwa mubuhambe, ne sili okhukwakhwo hasi tawe.

³⁷Nondel'langa abasuku banje nimbatiila, simbuulukhanga tawe okhwola olwa mbatibia bosi.

³⁸Mbakokanga hasi, ne sibanyala okhubuuka tawe. Bakwitsanga habilenje bianje nibamal'le okhulekwa.

³⁹Ungufuhasianga khulwe lihe, khandi umbeye obulechi khubasuku banje.

⁴⁰Ochilanga abasuku banje nibanzilukha; nase ndibianga yabo abambihil'lwanga.

⁴¹Bareebanga obukhonyi, nebutswa abulaho owakhabahonia tawe; basaayanga khu MWAMI, nebutswa naye sabakalusianga tawe.

⁴²Mbatubulanga ma bakwa singa olukhuukhi olwomuyeka kuhutsanga. Mbasenanga singa litoyi liokhumihanda.

⁴³Ibe umbonisie okhurula khu indiri yabandu, ma unyemekhele okhwamiha amahanga. Abandu aba ndali nisili okhumanya, luno bali hasi woburuchi bwanje.

⁴⁴Abacheni balanzitsila muluyali, balambuchil'la bwangu olwa bambulila.

⁴⁵Balarimukhwa ikholo, ma betse okhurula mutsiminga tsiabwe nibatechelanga.

⁴⁶OMWAMI ali Mwoyo! Omusooli wanje yetsoomibwe! Obukhongo bwa Nyasaye oumbonianga buchingulwe.

⁴⁷Yambetsanga obulechi khubasuku banje, aretsanga amahanga hasi webilenje bianje

⁴⁸niyasoola khubasuku banje. E OMWAMI umbetsanga obulechi khubasuku banje, niusoola khubandu abeinduli.

⁴⁹Khulwako khwitsoomianga hakari wabetsinzibulo; nyembanga tsinyembo etsiokhukhwitsoomia.

⁵⁰Nyasaye ahaananga obulechi obukhongo khumuruchi uwe; amanyianga obuyanzibwe inziayo khu uyo owa yali okhwahula, khu Daudi nende abolwibulolwe inziayo.