Read lunyore ETSISABURI 19 Bible Online

ETSISABURI 19 - lunyore bible

ETSISABURI 19

¹Likulu liribulanga obukhongo bwa Nyasaye; ne esilama esibambukhu nasio simanyianga habulafu emilimo chichie.

²Sielitukhu liribulanga obukhongo yibwo khwitukhu lilondakhwo, ne obutukhu nabwo bubumanyianga obutukhu bulondangakhwo.

³Obul'lomi kata amang'ana sikanyala okhurumikhilwa tawe; liyoosi silinyala okhuhul'likha tawe.

⁴Kata mbwo omwoyo kwabio kulan'nde musibala siosi, ne amang'ana kabio kol'le khusihesi sieliloba. Nyasaye yalombela eliuba hango halio mumalumbesi.

⁵Lirulanga mukamba tsuli, singa omusaatsa wes'selelo asangalanga olwa arulanga munzuye, khandi singa omupiemani okufuhal'le khulwa okhwilukha tsimbilo.

⁶Lisamulanga nilirula khulubeka l'lala lwelikulu, nilitsia buchiikha khulubeka lundi. Sibulaho esiakhanyala okhwebisa khumubasu kwalio.

⁷Amalako ko MWAMI namahesikhu; kahaananga tsingufu khumwoyo. Obukobokheli bwo MWAMI bwatooto, buhaananga obuchesi khuyabo abarali n'nabwo.

⁸Amebaalo ko MWAMI namalunji, nabo abakafumilanga bali nobusangali mumioyo chiabwe. Amalako ko MWAMI nakahabwene, kahaananga obumanyilisi khumakani.

⁹Okhwekayakaya OMWAMI nokhulahi; khulatsilil'la inziayo. Obukhalachi bwo MWAMI nobwahabwene, bubetsanga obwatooto khasotso.

¹⁰Buyanzisianga okhuyomba etsahabu isiyikhu okhusila. Nobwelungu okhuyomba obuukhi ob'buulu.

¹¹Bumbelesianga ise omurumikhiliwo obumanyilisi; ise nyoolanga omukabwa khulwo okhubulonda.

¹²Omundu wosi sanyala okhulola obusiamu bubwe tawe; OMWAMI, usoole okhurula khubusiamu obwebisu!

¹³Khandi usoole okhurula khutsimbi tsieinjinia; oralekha tsinyembel'le tawe. Ma nase ndakhaba omusiyikhu oralikhwo nobubi bwetsimbi tawe.

¹⁴Amang'ana kanje nende amapaalo kanje kahuchil'lwe khu ibe, OMWAMI, niwe obwilukhilo bwanje khandi omununuli wanje!