Read lunyore ETSISABURI 21 Bible Online

ETSISABURI 21 - lunyore bible

ETSISABURI 21

¹Omuruchi uyanzile, E OMWAMI, sichila ibe wamuhelesia tsingufu; asangalanga sichila ibe wamukhola omulechi.

²Ibe wamuhelesia akomwoyo kukwe kwekombanga; ibe wakalusia okhureeba khukhwe.

³Wetsa khuye, nomuha tsikhabi tsinyinji, ma nomubiikha olusimbi lwetsahabu khumurwe kukwe.

⁴Yali okhukhureeba obulamu, nawe nomuha, obulamu obwamatukhu amarambi khandi obweinziayo.

⁵Oluyali lulwe nolukali khulwo obukhonyi bubwo. Ibe omubiikhanga olukoosi nende obukhongo.

⁶Tsikhabi tsitsie tsili halala n'naye khasotso, ne okhulolekha khukhwo khuye khumuyanzisianga.

⁷Omuruchi asubilanga mu MWAMI Wokhunyala Biosi. Ne khulwa obuyanzi bwo MWAMI oburalilu, alabetsanga mumulembe khasotso.

⁸Omuruchi alatiila abasuku babe bosi; alatiila siomundu omubihil'lwanga.

⁹Alabamuma singa omul'lo okwatukhanga olwa alolekha. OMWAMI alabaamila milu mwirima lilie, ne omul'lo kulabasamba nikubamala.

¹⁰Kata mulala khubolwibulo lwabwe salahona tawe; Omuruchi alabatibia bosi.

¹¹Baloosianga amang'ana kabwe nibamusiemana, nebutswa sibalakhola esindu tawe.

¹²Alabalasa netsisele tsitsie, ma khulwako nabo balasukhana nibelukha.

¹³Khukhwitsoomianga OMWAMI, khulwe tsingufu tsitsio tsikhongo! Nakhwembe nikhwitsoomia obunyali bubwo.