Read lunyore ETSISABURI 22 Bible Online

ETSISABURI 22 - lunyore bible

ETSISABURI 22

¹Nyasaye wanje, Nyasaye wanje! Undekhele busina? Busina oli ehale okhukhonya nende khumang'ana kokhubinda khwanje?

²Mumubasu ndakayanga khuibe, Nyasaye wanje, nawe siungalusianga tawe. Nanganga khuibe mubutukhu, ne simbulukhanga tawe.

³Nebutswa ibe wayemekhwa singa Omutsienukhu Wenyene, Ibe owa Isiraeli yetsoomianga.

⁴Abakuka befwe bara obusubili bwabwe mwiwe. Bakhusubila ibe, nawe nobahonia.

⁵Balanga khuibe ma nibasoolwa musibi; bakhusubila ibe ne sibasimba emirwe tawe.

⁶Nebutswa ise sindi omundu khandi tawe; ndi butswa inyende, njiaywanga ninzekhel'lwa nende siomundu!

⁷Bosi abandolanga ise, banzekhel'langa, bakhomol'langa nibasungusa emirwe tsiabwe.

⁸Bambool'langa, “Ibe wali okhweleta khu MWAMI. Busina arakhuhonia? OMWAMI naba nakhusangal'la ibe busina arakhukhonya ibe?”

⁹Niwe owali okhumbonia olwa ndebulwa, niusoola olwa ndali nisili omwana omutoro.

¹⁰Okhurula ninzibulwa ndeletanga khuibe; nawe obetsanga Nyasaye wanje khasotso.

¹¹Orabba ehale n'nase tawe! Omunyakhano kuli ahembi, ne sialiho kata mulala owokhukhonya tawe.

¹²Abasuku abenji bafumbiye singa etsichulukhi, bosi bambotokhan'ne, singa etsichulukhi tsimbalaba etsia Bashani.

¹³Baasamianga eminwa chiabwe singa etsisimba, bahumanga nibakhasila ise.

¹⁴Tsingufu tsianje tsihweye, tsihweye singa amaatsi akasundukhile hasi. Amakumba kanje karul'le mubwonganilo; omwoyo kwanje kusal'lukhile singa ehula yamafura.

¹⁵Mwikosi mwanje mwomele singa olukhuukhi, olulimi lwanje luhandanga ikulu m'munwa kwanje. Nawe undekhele mulukuukhi singa omufu.

¹⁶Omukanda kwabandu ababi kufumbiye, bambotokhan'ne singa tsimbwa tsinyinji, babohanga amakhono kanje nende ebilenje bianje.

¹⁷Amakumba komubili kwanje kanyala okhubalwa. Abasuku banje bahenga nibarangala khu ise.

¹⁸Bakabana tsingubo tsianje, bakhupila esichendelwa sianje imbulu.

¹⁹E OMWAMI, orabba ehale n'nase tawe! Witse bwangu okhusoola!

²⁰Usoole khubulwani, osoole obulamu bwanje okhurula basuku abalulu yaba.

²¹Usoole khubasuku abalulu yaba; mbula tsingufu imbeli wetsichulukhi tsimbalaba yitsi.

²²Naribule emilimo chichio khubandu banje; nakhwitsoomie ibe mwibukaana liabwe.

²³“Mwitsoomie Nyasaye, inywe abarumikhilibo MWAMI! Mumuhe oluyali, inywe abolwibulo lwa Yakobo! Mumwekayakaye, inywe abandu ba Isiraeli!

²⁴Ye sachaayanga abatakha kata okhumaayia okhukhupa esibi khwabwe tawe. Kata sasukhan'ne okhubalekha tawe. Nebutswa abakalusianga olwa bamulanganga mbu abakhonye.”

²⁵Mwibukana liosi nakhwitsoomie ibe khulwe emilimo chichio. Imbeli we yabo abakhwekayakayanga nakhole omusango okwa ndesuha.

²⁶Abatakha balalia singa obwa benya; yabo abetsa khu MWAMI balamwitsoomia. Balahindihala inziayo!

²⁷Amahanga kosi kaletsul'la OMWAMI, Baletsa khuye okhurula siahabundu hosi musibala; abandu bamakondo kosi balamwitsoomia.

²⁸OMWAMI nomuruchi, ne yamihanga amahanga kosi.

²⁹Abandu abeloli bosi balamwinamila. Yabo bosi abomubili kwokhufwa balenama imbeliwe.

³⁰Tsinzibulo etsiakhetse tsiakhamurumikhile, abandu bakhabool'le tsinzibulo etsitsanga ako MWAMI.

³¹Abandu abasili okhwibulwa bakhabool'lwe mbu: “OMWAMI yali okhusoola abandu baabe.”