Read lunyore ETSISABURI 25 Bible Online

ETSISABURI 25 - lunyore bible

ETSISABURI 25

¹Ni khuibe OMWAMI owambanangakhwo amasaayo kanje;

²Ni mwiwe omwa subilanga, Oralekha simbe omurwe tawe; oralekha abasuku banje banzekhel'le tawe.

³Yabo abakhusubilanga ibe sibalalekwa tawe, nebutswa abalekwanga niyabo abanguhanga okhukhukhol'la ibe indiri.

⁴Umanyie ise tsinjila tsitso, OMWAMI, unzibaal'le tsing'anyi tsitsio.

⁵Unzibaal'le okhumenya obulamu bwobusubilwa khuibe. Okhuba niwe Nyasaye oumbonianga. Subilanga mwiwe khasotso.

⁶E OMWAMI, witsul'le tsimbabasi tsitsio, nende obuyanzibwo oburalilu, okhuba bubetsangaho khasotso okhurula khale.

⁷Oretsul'la obwoni bwobubuukha bwanje, kata esikala marwi sianje tawe. Unzitsul'le okhuhela khutsimbasi tsitsio, khulwo bulahi bubwo.

⁸OMWAMI nomulahi khandi nomulunji, khulwako yebaal'langa aboni injila eya bakwana okhulonda.

⁹Yemel'langa abechiehi munjila yobulunji; nabebaal'la obulalilo bubwe.

¹⁰Mubwatooto nende mubuyanzi yemel'langa bosi abalindanga indakano yiye, nibakhola amalakano kaake.

¹¹Khulwo luyali lweliira lilio OMWAMI, undekhele tsimbi tsianje, okhuba netsinyinji.

¹²Yabo abahulilanga OMWAMI, baleeka khuye injila eyabakwana okhulonda.

¹³Balahindihala khasotso, ne abaana babwe balaamihe esibala.

¹⁴OMWAMI nomulina we yabo abamuhulilanga, ne atinyilisianga indakano yiye khubo.

¹⁵Saayanga khu MWAMI mbu yakhonye amatukhu kosi, naye yasoolanga okhurula musibi.

¹⁶Osukhane khu ise ma umbeele esirenda, okhuba ndi sienyene khandi omutendekhele.

¹⁷Umbinie mubuhendi bwanje, ma umbonie mumanyakhano kanje kosi.

¹⁸Ohenge khukhusalila nende okhukhupa esibi khwanje, ma olekhele obwoni bwanje.

¹⁹Lola obwandi nabasuku abenji, lola obwa baasinyikhilanga ise okhusila.

²⁰Uninde ma usoole. Umbonie okhurula mukhuhulwa, nzilukhilanga mwiwe, khulwo mulembe.

²¹Obulahi bwanje nende obukol'lokhu bininde, okhuba subilanga mwiwe.

²²Onunule abandu ba Isiraeli E Nyasaye, okhurula mumanyakhano kabwe kosi.