Read lunyore ETSISABURI 28 Bible Online

ETSISABURI 28 - lunyore bible

ETSISABURI 28

¹Saayanga khuibe E OMWAMI, omusooli wanje, Hulila okhulakaya khwanje. Norangalusia tawe, ndalaba mulala khuyabo abekhanga musibala siabafu.

²Umbulile olwa mombanga obukhonyi khuibe, olwa njingulanga amakhono kanje nimengisie khu Hekaluyo inzienukhu.

³Oraakhalachila esiina halala nababi tawe, halala ne yabo abakholi bobubi, abandu abal'lomanga amang'ana komulembe, nebutswa abali nelirima mumioyo chiabwe.

⁴Obahe esinyasio khulwe ebikhole biabwe, khulwo obubi obwa bakhol'le. Obahe esinyasio khulwe milimo chiabwe chiosi; obahe okhuhelana nobubi bwabwe.

⁵Sibamanyilisianga emilimo chio MWAMI tawe, nohomba ebindu ebia yalomba tawe. Kho alabaha esinyasio nabamulula inziayo.

⁶OMWAMI ahebwe oluyali, sichila uhuliye okhulakaya khwanje khwokhureeba obukhonyi.

⁷OMWAMI niye ousinganga khandi niye omusooli wanje, lse subilanga muye. Yambetsanga obukhonyi niyasangasia omwoyo kwanje. Mwitsoomianga netsinyembo tsiobusangali.

⁸OMWAMI asinganga abandu baabe, asoolanga nahonia omuruchiwe omwelwa.

⁹Ohonie abandu baabo OMWAMI, ma okasie yabo abali abaabo, Obe omwayi wabwe, ma obalinde bulahi inziayo.