Read lunyore ETSISABURI 30 Bible Online

ETSISABURI 30 - lunyore bible

ETSISABURI 30

¹Nakhwitsoomie ibe, OMWAMI sichila wabeye okhumbonia, niwikal'la abasuku banje okhunzekhel'la.

²Ndali okhulakaya khuibe ninyenyanga obukhonyibwo, E OMWAMI Nyasaye wanje, nawe wali okhumbonia mubulwaye;

³Wali okhusoola okhurula musilindwa. Ndali nindi khunjila yokhutsia hasi musilindwa, nebutswa ibe wakalusia obulamu bwanje.

⁴Mwembe nimwitsoomia OMWAMI, inywe abandu be abasubilwa! Mwitsulile ako Mutsienukhu yakhola, ma mumukhupile embwo.

⁵Lirimalie liliho hatututu butswa, ne obulahibwe buliho inziayo. Okhuronyia amasika khuliho mubutukhu, nebutswa okhusangala khwitsanga mumabwebwe.

⁶Mukhusuka khwanje ndali okhuboola mbu, “Sindilekwakhwo tawe.”

⁷Khulwo obulahi bubwo E OMWAMI, wali okhuuralisia singa esikulu esirambi esikufu. Nebutswa olwa wabisa obwenibwo khu ise, ndali noburi obukali.

⁸Ndali okhusaaya khuibe OMWAMI, ndali okhukhuhomba ukhonye.

⁹“Nisina esia nonyoole mukhufwa khwanje? Nibukhala sina obwa nonyoola nimba ninzia musilindwa? Mbula balakhwitsoomia noho? Mbula bakhanyala okhuribula obulahibwo oburahwetsekhel'langa noho?

¹⁰Umbulile OMWAMI, ma umbeele tsimbabasi, ukhonye OMWAMI!”

¹¹Ibe usukhanisie esibeela sianje ma usikhol'le okhutsala khwobusangali, Umbinisiekhwo esibeela sianje, ma umbotokhanisiekhwo nobusangali.

¹²Kho sindasilang'ana tawe; Ndemba nikhwitsoomia ibe. OMWAMI, ibe oli Nyasaye wanje, Nakhukhupilenje embwo khasotso.