Read lunyore ETSISABURI 31 Bible Online

ETSISABURI 31 - lunyore bible

ETSISABURI 31

¹Nzitsanga khuibe OMWAMI mbu usoole, orandekha mukhuhulwa tawe. Ibe oli Nyasaye wobwatooto, khusaayanga umbonie!

²Rekia esirwi sisio ma umbonie luno, Obe obwilukhilo bwanje ma usoole; obe oluhinga lwanje olwokhusoola.

³Niwe obwilukhilo bwanje khandi omusooli wanje, unzibaal'le ma unyemel'le singa obwa wali okhusubisia.

⁴Umbonie khumibero etsia ndarechekhelwa; usinge okhurula musibi.

⁵Nderetsanga mubulindi bubwo, umbonie OMWAMI; Ibe oli Nyasaye omusubilwa.

⁶Obihil'lwanga yabo abekayakayanga abanyasaye bobubehi, nebutswa ise subilanga mwiwe.

⁷Nanyanze nisangala khulwo obuyanzibwo oburalilu. Ibe ololanga okhukhupa esibi khwanje. Khandi wamanya omunyakhano kwanje.

⁸Siwahuchil'la abasuku banje okhumbila mubuhambe tawe. Waimbuchil'la okhutsia hosi ahanyenya.

⁹Umbeele tsimbabasi, OMWAMI, okhuba ndi mumunyakhano. Tsimoni tsianje tsitohele khulwo okhulakaya okhwinji, mbweleywe tsingufu okhusila.

¹⁰Mbweye tsingufu khulwe esibeela, ne okhwekhuula khutitihisie obulamu bwanje. Ndi omutofu khulwa manyakhano kanje kosi; kata amakumba kanje kakhunguhanga.

¹¹Abasuku banje bosi, ne okhusila muno abarende banje, bakhol'langa inzekhelesi; yabo abali nibaamanya baritsanga, banzilukhanga olwa bandolanga mumihanda.

¹²Abandu bosi bayinzibil'la singa omundu owafwa; ndi butswa singa esindu esiafuubwa.

¹³Mbulilanga abasuku abenji nibamonyananga, ne esibi simbotokhananga. Balombanga amang'ana kokhufukula, nibasiemana okhunzira.

¹⁴Nebutswa okhunaaya khwanje khuli mwiwe, E OMWAMI. Niwe Nyasaye wanje.

¹⁵Mbetsanga mubulindi bubwo khasotso, umbonie khubasuku banje, nende khuyabo abaakhupianga esibi.

¹⁶Ohenge khumurumikhili uwo netsimbabasi, umbonie mubuyanzibwo oburalilu.

¹⁷Nanganga khuibe OMWAMI, oralekha simbe omurwe tawe. Lekha abakholi bobubi basimbe emirwe, lekha batsie nibabun'ne tsi musibala sie Makombe.

¹⁸Osiling'anie yabo abali abakaati; abekhonyi nende abeinjinia bosi, abakholanga inzekhelesi khubandu abalunji.

¹⁹Mako obwe ebindu bili ebilahi, ebiobiikhilanga yabo abakhuhetsanga oluyali! Siomundu umanyile obwoli omulahi, obwolindanga obulahi yabo abasubilanga khuibe.

²⁰Obabisanga habundu halahi aholi, okhurula mubusiemani bwabandu. Obabisanga musiinikha esilahi, okhurula khumanyeko kabasuku babwe.

²¹OMWAMI yetsoomibwe; okhuba yamanyia obuyanzi bweoburalilu khu ise, olwa ndafumbilwa nende okhwinjil'lwa.

²²Ndaria ma nimbaala mbu, unzilusisie okhurula imbeliwe, nebutswa yahulila okhulakaya khwanje, olwa ndalanga khuye mbu yakhonye.

²³Mumuyanze OMWAMI, inywe abandube abasubilwa mwesi. OMWAMI asoolanga abali abasubilwa, nebutswa ahaananga esinyasio khubekhonyi singa bakwananga okhunyoola.

²⁴Mukufuhale, mube neikholo inywe mwesi abanaayanga khu MWAMI.