Read lunyore ETSISABURI 32 Bible Online

ETSISABURI 32 - lunyore bible

ETSISABURI 32

¹Nabeikhabi abetsimbi tsiabwe tsialekhelwa, khandi abobusiamu bwabwe bwabelel'lwa.

²Noweikhabi omundu uyo owo MWAMI aramubalanga singa omusiamu, khandi owobukaati burali mumwoyokwe.

³Olwa ndabula okhweyama tsimbi tsianje, ndali okhuchonya khulwo khulakaya om'basu kwosi.

⁴Om'basu nobutukhuibe wambelesia esinyasio OMWAMI; tsingufu tsianje tsiosi tsiahwa singa om'basu omululu kukhamulusianga eliime.

⁵Nilwo olwa ndeyama tsimbi tsianje khuibe; sindabisa obusiamu bwanje tawe. Ndakhalaka mumwoyo okhubweyama khuibe, nawe walekhela tsimbi tsianje tsiosi.

⁶Kho abandu bosi abasubilifu khuibe, bakhoya okhusaaya khuibe mutsinyinga tsiobutambi; olwa omunyakhano kwinjila singa omuchela omukali, sikunyala okhwola khubo tawe.

⁷Niwe obwebisilo bwanje, Ibe olambonia mumunyakhano kwanje. Nyembanga butinyu khukobuhonia bubwo, sichila ibe unindanga butinyu.

⁸OMWAMI aboolanga mbu, “Nakhakhumanyie injila yokwana okhulondakhwo, nakhwibaal'le nende okhukhuchetsiyia.

⁹Orabba omuhingwa singa esululi nahomba inyumbu esukhanibwanga nende ebisambo nemikoye, okhuchikhola okhwelela khumweneyo tawe.”

¹⁰Abasiamu bakhakhupe esibi, nebutswa yabo abanaayanga mu MWAMI, balindwanga bulahi nobuyanzibwe oburalilu.

¹¹Inywe abali abalunji muyanze nimusangala, khulwa amang'ana ako MWAMI akhol'le. Inywe abamuhulilanga, muhanzukhe khulwo busangali.