Read lunyore ETSISABURI 33 Bible Online

ETSISABURI 33 - lunyore bible

ETSISABURI 33

¹Sangale mu MWAMI inywe abalunji mwesi, mumwitsoomie, inywe mwesi abakol'lokhu.

²Mwitsoomie OMWAMI namalele, mumwembele khubukhana bwetsinziha.

³Mumwembele olwembo oluyia, mukhupe obukhana obulahi, nimukhupa liyoka liobusangali.

⁴Amang'ana ko MWAMI nakatooto, ne emilimochie nechiokhusubilwa.

⁵OMWAMI ayanzanga yako akali akatooto khandi amalunji; obuyanzi bweoburalilu bwitsusianga esibala.

⁶OMWAMI yalonga likulu khulwo khulaka butswa ling'ana lilie, nalonga eliuba, omwesi netsinyininyini khulwo okhuboola ling'ana lionyene.

⁷Yabunjelesia amaatsi ketsinyanza nakara habundu halala, ma nakabiikha munyanza ingali.

⁸Murie OMWAMI, inywe mwesi abomusibala! Murie nimumuha oluyali, inywe abandu bosi abomwiloba!

⁹Yaboola butswa ling'ana ne esibala nisilongwa; khulwe lilako lilie ebindu biosi bialolekha.

¹⁰OMWAMI afubianga amachoomo kamahanga; akekal'langa okhukhola akamapaalo kaako.

¹¹Nebutswa obuloosiebwe buhindilanga inziayo, amachoomoke kahesikhanga amatukhu kosi.

¹²Neliekhabi lihanga yilio elia Nyasaye walio ali OMWAMI; nabeikhabi abandu yabo abayeela okhuba abaabe omwene!

¹³OMWAMI ahenganga okhurula mwikulu, ne alolanga abandu bosi.

¹⁴Okhurula khuluruba lulwe ahenganga hasi, khubosi abamenyanga khusibala.

¹⁵Niye olombanga amapaalo kabwe kosi, khandi wamanya kosi akabakholanga.

¹⁶Omuruchi sialekanga khulwa abasikaribe nabakufu tawe; omusikari sianyoolanga obulechi khulwetsingufu tsitsie tawe.

¹⁷Etsisululi tsielihe sitsili esindu khulwobulechi tawe; tsingufu tsiatsio tsinyinji sitsinyala okhusoola tawe.

¹⁸OMWAMI alolanga yabo abamuhulilanga, yabo abasubilanga mubuyanzibwe oburalilu.

¹⁹Abahonianga okhurula mulufu; abahetsanga obulamu munyinga tsiesimotso.

²⁰Okhunaaya khwefwe khuretsanga mu MWAMI, niye omulindi wefwe khandi obukhonyi bwefwe.

²¹Khuyanzanga khulwaye, khusubilanga muye sichila nomutsienukhu.

²²Obuyanzibwo oburalilu bube n'nefwe OMWAMI, olwa khuretsanga okhunaaya khwefwe mwiwe.