Read lunyore ETSISABURI 34 Bible Online

ETSISABURI 34 - lunyore bible

ETSISABURI 34

¹Namboolenje embwo khu MWAMI khasotso, sinandekhe okhumwitsoomia tawe.

²Namwitsoomie khulwamang'ana aka yakhola, lekha bosi abaaminwanga bahulile ma bayanze!

³Mulandie halala n'nase obukhongo bwo MWAMI; chende khumwitsoomie halala!

⁴Ndali okhusaaya khu MWAMI naye niyangalusia; yambinia muburi bwanje bwosi.

⁵Henge khuye ne mulasangala, ne simwakhasimba emirwe tawe.

⁶Abatambi basaayanga khuye naye abakalusianga, abahonianga okhurula mumanyakhano kabwe kosi.

⁷Om'malaikawe alindanga yabo abahulilanga OMWAMI, nabanunula okhurula musibi.

⁸Murunilisie abene mulole obwa OMWAMI ali omulahi. Nabeikhabi yabo abelukhilanga khu MWAMI okhunyoola abuhuluukhi.

⁹Murie OMWAMI, inywe abandube bosi, yabo abamuritsanga banyoolanga kosi akabatakhanga.

¹⁰Kata etsisimba tsitakhangakhwo esiatsilia nitsihonga nzala, nebutswa yabo abahulilanga OMWAMI sibatakhanga esindu siosi esilahi tawe.

¹¹Mwitse inywe abalina banje ababuukha mumbulile, nase ndakhamwibaal'la obwokhuria OMWAMI.

¹²Wakhekombakhwo okhusangal'la obulamu, nende okhumenya oluhono olurambi halala nokhusangala?

¹³Kho wekaye okhul'loma amabi, nende okhuboola obukaati.

¹⁴Orule mububi ne akhole obulahi; orunilisie omulembe nomwoyo kwo kwosi.

¹⁵Tsimoni tsio OMWAMI tsihenganga khubalunji babe, ne amarwike kahulilanga okhulakaya khwabwe;

¹⁶nebutswa afukulanga yabo abakholanga obubi, kho, olwa baba nibafwiye, bebil'lwe bwangu.

¹⁷Abalunji balanganga khu MWAMI, naye abahulilanga, abanunulanga okhurula mumanyakhano kabwe kosi.

¹⁸OMWAMI ali ahembi khu yabo abesikokele, ahonianga yabo abarali nobunaayi.

¹⁹Amanyakhano komundu omulunji namenji, nebutswa OMWAMI amuhinianga muko kosi;

²⁰OMWAMI amusoolanga kupu; kata elala khumakumbake siliakhafunikhakhwo tawe.

²¹Obubi bulitibia abasiamu; yabo ababihil'lwanga abalunji balanyoola esinyasio.

²²OMWAMI alahonia abandu baabe; yabo abatsitsanga khuye okhunyoola obulindi sibalakhalachilwa tawe.