Read lunyore ETSISABURI 35 Bible Online

ETSISABURI 35 - lunyore bible

ETSISABURI 35

¹OMWAMI, fukula yabo abaafukulanga ise, khandi olwane yabo abanwananga!

²Bukula esikhumbasio nende esilasan'nwe, ma witse okhusoola ise.

³Chinguula lifumo lio nende esoka okhulwana yabo abanondel'langa. Umbool'le mbu nausoole.

⁴Lekha yabo abarunanga okhunzira bakhuywe nibasimbibwa emirwe! Lekha yabo abakholanga obusiemani khu ise bakalusibwe tsimbilo nibaramanya ahabatsitsanga!

⁵Lekha babe singa omukhuutsi okuhilwanga nobusindu, olwo om'malaika wo MWAMI abalondel'la.

⁶Lekha injila yabwe ebe esiilima khandi irelele, olwo om'malaika wo MWAMI abang'usa nibakwa hasi

⁷Baarechekhela omubero sila esikha siosi, nibayaba obuko oburambi okhundiil'lamwo.

⁸Nebutswa balamumwa olwa basili okhumanya; balahambwa mumubero kwabwe abene nibakwa mubusasikhi bwabwe abene!

⁹Nilwo olwa nase ndilisangala khulwo MWAMI. Ndakhasangale sichila ye umbonisie.

¹⁰Nambool'le OMWAMI nomwoyo kwanje kwosi mbu, “Abulaho oli singa ibe. Osoolanga abatekhele okhurula khubakufu, abamanani okhurula khubasandi.”

¹¹Abandu babi baboolanga amang'ana akokhufukula ise, nibanzal'la amabi ake ise ramanyilekhwo tawe.

¹²Baarunganga obubi khubulahi bwanje, nase sikaye musibeela esikali.

¹³Nebutswa olwa bali abalwaye, ndebiikha tsingubo tsiesibeela; ndeyima kata okhulia; ndasaaya ninyinamisie omurwe hasi,

¹⁴singa osaayilanga omulina wanje nohomba amwabo wanje. Ndabotokhana yi ne y'yi nimbeeleye okhusila singa omundu owekhulanga nyinawe.

¹⁵Nebutswa olwa nase ndali mumunyakhano, bosi bayanza, nibebunjikha halala okhunzekhel'la; abacheni baakhupanga nibatsilil'la okhunyasia sila okhulekha.

¹⁶Batsilil'la okhukhol'la inzekhelesi ingali, ma nibandiila amakhasi muburima.

¹⁷Notsilil'le okhuhenga butswa khulwo luhono sina, OMWAMI? Usoole okhurula khuburindi bwabwe, ohonie obulamu bwanje okhurula khubasuku yaba.

¹⁸Nase nakhukhupile embwo mwibukana liabandu baabo; nakhwitsoomie imbeli wabwe bosi.

¹⁹Oralekha abasuku banje, ababehi yabo, basangal'le okhukwa khwanje tawe. Oralekha yabo abambihil'lwanga sila esikha, bayanze khulwe esibeela sianje tawe.

²⁰Sibal'lomanga munjila yomulembe tawe; musilenje yisio bakunzanga obubehi bwetsimbila tsiosi khubandu abayanza omulembe.

²¹Banyinjil'langa nibaboola mbu, “khwaluutsi akawakhol'le!”

²²Nebutswa ibe E OMWAMI uluutsi yako, khulwako orasiling'ana tawe, OMWAMI; Orekhala ehale n'nase tawe!

²³Buukha E OMWAMI ma usinge khubo, witse, Nyasaye wanje, ungolekhwo muliiba lianje.

²⁴E OMWAMI Nyasaye wanje, Ibe oli omulunji, kho obabool'le mbu mbula esikha; oralekha abasuku banje basangal'le amabi kanje tawe.

²⁵Oralekha baboole mumioyo chiabwe mbu, “Khumumal'le pe! Yako niko aka khwali okhwenya!”

²⁶Yabo abasangal'langa okhusaalila khwanje, balamalilwa elala nibakoyanibwa; yabo abekholanga obalahi okhunyomba ise, balahambwa netsisoni nende es'simba murwe.

²⁷Nebutswa lekha yabo abayanzanga okhulola nirali nesikha bakhupe liyoka liobusangali nibayanza; basangale ma baboole nibakalukhilamwo mbu, “OMWAMI nomukhongo okhusila! Ayanzisibwanga nokhuleka khwomurumikhiliwe.”

²⁸Nase namanyie obulunjibwo habulafu, khandi nakwitsoomie om'basu kwosi.