Read lunyore ETSISABURI 36 Bible Online

ETSISABURI 36 - lunyore bible

ETSISABURI 36

¹Tsimbi tsil'lomanga khumundu omusiamu mumwoyo kukwe mukari, Mumapaalo kaake salolangakhwo okhuria Nyasaye nesindu tawe.

²Sichila omwene yebukul'langa hekulu mumapaaloke, apaalanga mbu Nyasaye sanyala okhulola tsimbi tsitsie ma amukhalachile esiina tawe.

³Amang'anake namasiamu aketsulamwo obukaati; sakholanga akobuchesi nende obulahi tawe.

⁴Akanakananga okhukhola obubi nakon'ne musitanda; kosi aka akholanga namabi. Ne siafukulanga obubi bwosi tawe.

⁵OMWAMI, obuyanzibwo oburalilu bwoolanga nomwikulu; obusubilwabwo bwoolanga nomumalumbesi.

⁶Obwatootobwo burambiyanga singa ebikulu; obulunjibwo buli singa olutungu lwetsinyanza. Abandu halala netsisolo bali mubulindi bubwo.

⁷Obuyanzibwo oburalilu nobukaasu okhusila, E Nyasaye! Khunyoolanga obulindi musiinikha sietsimbaha tsitsio.

⁸Khulitsanga khubiokhulia ebiohananga mubwinji; okhuhuchil'langa okhunywa amaatsi komuchela kwobulahi bubwo.

⁹Niwe es'sina siobulamu bwosi burulanga mwo, ne obulafu bubwo nibwo obukhosianga obulamu bwefwe.

¹⁰Otsilil'le okhuyanza yabo abakhumanya ibe, nokhol'la abalunji obulahi.

¹¹Oralekha abandu abekhonyi basolanie tawe, kata abasiamu bakhunganie tawe.

¹²Lola aha abasiamu bakwiye, Bakon'neho, sibanyala okhubuukha tawe.