Read lunyore ETSISABURI 37 Bible Online

ETSISABURI 37 - lunyore bible

ETSISABURI 37

¹Orahenda khulwa amang'ana kabasiamu, kata arakhayilwa yabo abakholanga obubi tawe.

²Balakhamulukha bwangu singa obunyasi obwomanga; balafwa singa ebiraakwa ebinialanga.

³Osubile mu MWAMI ma akhole amalahi, omenye musibala ma obe nobulahi.

⁴Orune obusangali bubwo mu MWAMI, naye alakhuha kosi akomwoyokwo kwenyanga.

⁵Wehaane khu MWAMI, osubile muye, naye alakhukhonya;

⁶alachila obulunji bubwo bung'inang'ine singa eliuba liakhanga m'mubasu hakaru.

⁷Wesimilisie ma olindil'le OMWAMI akhole emilimo; orahenda khulwe yabo abahindihalanga, nohomba yabo abanyoolanga amalahi khulwobuloosie bwabwe obubi tawe.

⁸Oralekel'lwa nesihenda mwoyo nohomba lirima tawe; yako kaleeranga omunyakhano.

⁹Yabo abusubilanga mu MWAMI balalaamilwa esibala, nebutswa abasiamu balamumwa.

¹⁰Abasiamu balarulaho bwangu; niwakhabakhaaba siwakhabalolakhwo tawe.

¹¹Abetutuyi bakhalaamilwe esibala, nibalia obwale nomulembe.

¹²Omundu omusiamu asiemananga omundu omulahi, namukhwayul'la ameno muburima.

¹³Nebutswa OMWAMI atsekhanga abandu abasiamu, sichila umanyile mbu nabamululwe bwangu.

¹⁴Abasiamu bachomolanga tsinganga tsiabwe nibafumba obuyingo bwabwe, okhwira abamanani nende abatambi, okhwira yabo abakholanga amalunji.

¹⁵Nebutswa baleerwa netsinganga tsiabwe abene, ne obuyingo bwabwe bulamekulanibwa.

¹⁶Bitititi ebiomundu omulahi ali n'nabio, nebietsikhabi tsingali okhuyomba obuhinda bwabasiamu,

¹⁷OMWAMI alabukula tsingufu tsiabasiamu, nebutswa nasoole yabo abali abalahi.

¹⁸OMWAMI alindanga yabo abamuhulilanga, ne alabalamila esibala inziayo.

¹⁹Sibasalila olwe tsinyinga tsiba tsimbibibi tawe; balaba n'nabio ebibahela munyinga tsiesimotso.

²⁰Nebutswa abasiamu balatiba; abasuku bo MWAMI balakhamulukha singa obwamu bwomubulimo, balatuuma singa omwosi nibatiba.

²¹Omundu omusiamu akopanga likobi ne sarunganga tawe, nebutswa omundu omulunji ahaananga ebihanwa bibie namakhono amasiro.

²²Yabo abo MWAMI yalaamila tsikhabi balalaamilwa esibala, nebutswa yabo abayalaama esilaamo siobubi balahinibwamwo.

²³OMWAMI yemel'langa omundu munjila yalondakhwo, ne asoolanga yabo abamuyanzisianga.

²⁴Kata nibakwa, sibalabutsa hasi tawe, sichila OMWAMI alababuusia.

²⁵Luno ise ndi omusakhulu, ndamenya oluhono olurambi, nebutswa sili okhulolakhwo omundu omulahi niyebiliywe na Nyasaye, nohomba abaana baabe nibasabanga ebiokhulia.

²⁶Mutsinyinga tsiosi ahaananga sila omurungo, nahambia libere khubandi, ne abaanabe nabetsikhabi.

²⁷Murule mubusiamu ma mukhole obulahi, ne abolwibulo lwenywe nabamenyenje musibala khasotso.

²⁸OMWAMI wayanza akatooto, ne siyebil'langakhwo abandube abasubilwa tawe. Abasoolanga inziayo, nebutswa olwibulo lwabasiamu lulamumwa.

²⁹Abalunji balalaamilwa esibala, nibamenyamwo inziayo.

³⁰Amang'ana komundu omulahi nakobuchesi, khandi nakahabwene khasotso.

³¹Abiikhanga amalako ka Nyasayewe mumwoyokwe, ne salekhanga okhukalonda tawe.

³²Omundu omusiamu ahichil'langa omundu omulahi, nateema okhumwira;

³³Nebutswa OMWAMI sanyala okhumulekha mubunyali bwomusukuwe, nohomba okhumukhalachila esiina olwali mukhuyaalwa tawe.

³⁴Biikhe okhunaaya khwenywe mu MWAMI, mulonde amalako kaake; ye alamufumia ma amulaamile esibala, nenywe mulalola abasiamu nibahinibwanga mwo.

³⁵Ndalolakhwo omundu owalinji omululu okhusila, yasen'na abandu bosi hasi singa emisiita chia Lebanoni.

³⁶Nebutswa olunyuma ndabira, ne siyaliho tawe; ndamuruna, ne sindamunyoola tawe.

³⁷Kole mulole omundu omulahi, omundu omulunji, omundu wemilembe abetsanga nolwibulo,

³⁸nebutswa aboni bamululwanga bosi pe, ne olwibulo lwabwe lulatiba.

³⁹OMWAMI ahonianga abandu abalunji, nabasoola munyinga tsieminyakhano.

⁴⁰Abahabinanga nabakhonya, abahonianga okhurula khubasiamu, sichila niye owa belukhilangakhwo abasoole.