Read lunyore ETSISABURI 40 Bible Online

ETSISABURI 40 - lunyore bible

ETSISABURI 40

¹Ndali okhwesimilisia ninindil'langa obukhonyi okhurula khu MWAMI; naye yareka esirwi ma nahulila okhulakaya khwanje.

²Yaakhwesa okhurula mubuko bwesibi, okhurula musitondohi. Niyanzikhasia obulahi khulwanda, ma naralisia injenda yanje.

³Yanzibaal'la okhwemba olwembo oluyia, olwembo lwokhwitsoomia Nyasaye wefwe. Abenji abakhalole yaka bakharie, ma bakhare obusubili bwabwe mu MWAMI.

⁴Bali neikhabi yabo abasubilanga mu MWAMI, abarekayakayanga emisambwa, nohomba kata okhusanga ne yabo abekayakayanga abanyasaye bobubehi.

⁵Ibe wakhola mwifwe ebindu ebinji E OMWAMI Nyasaye wefwe; abulaho oli singa Ibe! Wakhuloosisia amang'ana amenji akokhuchenya. Sindakhanyala okhukaboola kosi tawe, obubali bwako nobukali okhusila!

⁶Ibe sorunanga emisango nende ebihanwa tawe; sosabanga tsinyama etsisambiywe khulusambwa tsinjima tawe, nohomba emisango chie tsimbi tawe. Musilenje yisio waimbelesia amarwi kokhukhuhul'la ibe.

⁷Khulwako ndali okhukhukalusia mbu, “Nise uno; amebaaloko khu ise kali musitapu sia malako.

⁸Ise nyanzanga okhukhola obulalilo bwa Nyasaye wanje! Mbikhanga amebaaloko mumwoyo kwanje.”

⁹Mwibukana liabandubo bosi OMWAMI, ndababool'la amang'ana amalahi akobuhonia bubwo. Ibe umanyile mbu sindilekha akhukaribula tawe.

¹⁰Sindabisa amang'ana kobuhonia khulwanje tawe; khasotso mboolanga akobusubilwabwo nende obukhonyibwo. Mwibukana likali simbul'le okhubool'la abandubo, khukobusubilwabwo nende akobuyanzibwo oburalu tawe.

¹¹OMWAMI, manyile mbu siolilekha okhuba netsimbabasi khu ise tawe. Obuyanzi bwobusubilwabwo bulaninda ise.

¹²Mbotokhan'nwe nende amanyakhano amenji, namenji akaranyala okhubawa! Tsimbi tsianje tsinyoleleye, ne sinyala okhulola khandi tawe. Netsinyinji okhuyomba liswi liokhumurwe kwanje, nase sindi neikholo tawe.

¹³E OMWAMI yanza usoole! E OMWAMI, wanguhe okhuukhonya!

¹⁴Lekha yabo bosi abatemanga okhunzira, balekwe bosi nibakoyanibwa! Lekha yabo abasangalanga khulwa amanyakhano kanje, bakalukhile emikongo nibasimba emirwe.

¹⁵Lekha yabo abangokonyelanga, besikoke khulwo okhulekwa khwabwe.

¹⁶Lekha yabo abetsanga khuibe bayanze nibasangala. Yabo abasangal'langa obuhonia bwabwe, baboolenje mbu, “OMWAMI nomukhongo okhusila.”

¹⁷Ndi omutekhele mutsingufu, khandi omubisandu E OMWAMI, nebutswa ibe osili okhunzibil'la tawe. Niwe omuhonia wanje khandi Nyasaye wanje Yitsa bwangu umbabine!