Read lunyore ETSISABURI 42 Bible Online

ETSISABURI 42 - lunyore bible

ETSISABURI 42

¹Singa esitsusu sibetsanga nobuluho khumaatsi amanyifu komuchela, nimbwo omwoyo kwanje kuli nobuluho khuibe E, Nyasaye.

²Omwoyo kwanje kuli nobuluho khuibe, Nyasaye oli mwoyo. Nilina ndakhetsa okhusaaya imbeli uwo?

³Ndakayanga om'basu nende obutukhu, ne abasuku banje bareeba buli khase mbu, “Nyasaye uwo ali hena?”

⁴Omwoyo kwanje kwesikokele olwa nzitsul'langa akabira, olwa ndali okhwemel'la omukanda okhutsia khunyumba ya Nyasaye, obwa ndali okhusangala nende okhwemba tsinyembo tsiokhukhupa embwo, halala nomukanda okwitsusianga litukhu likali.

⁵Busina ise ndi omubelelu? Busina ise ndi nokhunyakhana? Nambikhe obunaayi bwanje khu Nyasaye, ma khandi namwitsoomie sichila niye omuhonia wanje khandi Nyasaye wanje.

⁶Omwoyo kwanje kwesikokele, khulwe yako khwitsul'langa ibe, E Nyasaye, okhurula musibala sia Yorodani nende Herimoni, nende okhurula musikulu sia Misari.

⁷Ye umal'le okhuurumila ebikubuli biobubelelu khumwoyo kwanje. Amanyakhano kahol'langa khu ise singa omuchela okwitsuye.

⁸Makano OMWAMI wamanyia obuyanzi bubwe oburalilu m'mubasu nase mbe onyala okhwemba butukhu, nisaaya khu Nyasaye wobulamu bwanje.

⁹Nareebe Nyasaye ousinganga khubasuku banje mbu, “Busina unzibil'langa? Busina nzilil'le okhusaalila khulwo burima bwabusuku banje?”

¹⁰Mal'le okhuminwa namanyeko kabwe; olwa batsililanga okhureeba mbu, “Nyasaye uwo alihena?”

¹¹Busina ise ndi omubelelu? Busina ise ndi nokhunyakhana? Nambikhe obunaayi bwanje khu Nyasaye ma khandi namwitsoomie. Sichila niye omuhonia wanje khandi Nyasaye wanje.