Read lunyore ETSISABURI 44 Bible Online

ETSISABURI 44 - lunyore bible

ETSISABURI 44

¹Ifwe khuhuliye namarwi kefwe, E Nyasaye, ababuka befwe bakhubooleye akebindu ebikali ebiawakhola mumatukhu kabwe, mumatukhu akali kakhale.

²Singa ibe omwene wali okhukhunga amahanga, ne nora abandu baabo mumaloba kabwe; khandi singa wahaana esinyasio khubetsinzibulo tsindi, khandi nochila abandu baabo nibahindihala okhusila.

³Abandu baabo sibanyoola esibala khulwo okhulwana nolukanga; sibanyoola khulwe tsingufu tsiabwe tawe; banyoola esibala khulwo obunyali bubwo nende tsingufu tsitsio, khulwo okhumanyilisia mbu ibe oli n'nabo, yako kamanyianga mbu ibe wabayanza.

⁴Ibe oli omuruchi wanje khandi Nyasaye wanje; ohaananga obulechi khubandu baabo,

⁵ne khulwobunyali bubwo khulekanga abasuku befwe.

⁶Ise sisubilanga mubuhingo bwanje, nohomba mulukanga lwanje khulwo okhuusoola tawe;

⁷nebutswa ibe wakhusoola okhurula khubasuku befwe. Khandi noleka yabo bosi abakhusinyikhila ifwe.

⁸Ifwe khulakhwitsoomia khasotso, nende okhukhupila embwo inziayo.

⁹Nebutswa luno ibe wakhufuuba ma walekha ifwe mbu khulekwe; ma siochendanga halala nende abasikari befwe tawe,

¹⁰ochilanga ifwe nikhwilukha abasuku befwe, ma kachila abasuku bayaaka ebindu biefwe.

¹¹Wakhulekha ifwe okwirwa singa amakondi; wakhusalaania mubibala bia betsimbia.

¹²Ibe wakusia abandu baabo khubukusi bwa hasi, sichila wapaala mbu sibali abobukusi bweikulu tawe.

¹³Abarende befwe bali okhulola akawali okhukhukhol'la ifwe, ma nibakhukhol'lakhwo esihenyehenye nende okhukhutsekhel'la.

¹⁴Ibe wakhukhola singa esindu siokhuchaaywa nende abetsimbia; bakhunyekanga ifwe nibasungusa emirwe chiabwe.

¹⁵Ise ndamenya mutsisoni; es'simba murwe siamenya nisinditsanga,

¹⁶olwa mbul'langa amaseyo nende amenyeko kabasuku banje nende yabo abasinyikhilanga.

¹⁷Yaka kosi kekholekha khu ifwe, kata nikali ifwe sikhwakhwibil'la tawe, nohomba okhufunaka indakano eya khwahuchilisania n'nawe tawe.

¹⁸Ifwe khusili okhukhufukulakhwo; khusili khufunakakhwo amalako kaako.

¹⁹Nebutswa wakhulekha abaranyala esindu mutsinyama nabulimo; wakhulekha musiilima esimwamu t'ti.

²⁰Khulaba nikhwalekha okhwekakaya Nyasaye wefwe, ne khusaayanga khubanyasaye betsimbia tsindi,

²¹khane ibe wakamanya, sichila wamanya akamabiswi akali mumioyo chiefwe.

²²Nebutswa niwe ochilanga nikhwirwa buli khase; sichila khufwananibwanga nende likondi liokhwirwa.

²³Buukha, OMWAMI! Busina okonanga? Buukha omwene! Orakhufuba khulwe inziayo tawe!

²⁴Busina webisanga okhurula khu ifwe? Orebil'la okhusaalila khwefwe nende okhunyakhana khwefwe tawe.

²⁵Khukwiye nende okhusen'nwa hasi; khukon'ne hasi mulukuukhi khulwo okhulekwa.

²⁶Yitsa okhukhonyel'le! Okhusoole khulwobuyanzi bubwo oburalilu!