Read lunyore ETSISABURI 45 Bible Online

ETSISABURI 45 - lunyore bible

ETSISABURI 45

¹Amang'ana amalahi ketsuye mumwoyo kwanje, olwa ndosianga amang'ana kolwembo lwokhwembela omuruchi. Singa ekalamu yomuhandichi omuhalaba, ol'limi lwanje lwerechekhele okhuboola ebiasia biolwembo tsana.

²Ibe oli nelikondo lilahi okhuyomba abasaatsa bandi bosi; oli omul'lomi omulahi; Nyasaye akhulaamilanga tsikhabi khasotso.

³Boha olukanga lulwo mus'sienje sisio, ibe omuruchi wetsingufu; ibe oli omuruchi weifuma khandi owobunyali.

⁴Yilusia esululi yiyo nolutswoni nohengele khubulechi, sichila ukobokhelanga akatooto nende obukhalachi obwahabwene! Tsingufu tsitsio tsilakhuler'ra obulechi obukali!

⁵Tsisele tsitsio netsinzochi, tsirotsanga emioyo chiabasuku baabo, abetsimbia bakwa hasi mubilenje bibio.

⁶Lihanga elia Nyasaye amal'le okhukhuhelesia, liakhamenye khulwe inziayo. Wamihanga abandu baabo mubwatooto;

⁷oyanzanga amalunji ne nobihil'lwe amabi. Yako niko akachil'le Nyasaye, oli Nyasaye uwo nakhwela, ma wakhuyanza okhusila okhuyomba omuruchi undi wosi.

⁸Tsingubo tsitsio tsiosi tsihunyanga esuswa yamafura kamanemane nende omusubili; abembi bakhusangasia netsinyembo munyumba yomuruchi eyang'oonibwa nameno ketsinzofu.

⁹Abakhaana babaruchi nibalala khubakhaye abali m'mukitsi kukwo, ne omukhaye usinjiye khumukhono musaatsa kwoluruba lulwo, niyesiahile etsahabu inzele okhusila.

¹⁰Omukhaana owahambwa nomuruchi, hulila akanzia okhuboola, wibil'le abandu benywe nende abekho baabo.

¹¹Likondo lilio lilahi lichil'le omuruchi akhwekombanga, niye omwami uwo, kho okhwola omuhulile.

¹²Abandu okhurula Tiro balakhuleer'ra ebihanwa; abandu abahinda balateema okhukhuyanzisia.

¹³Omukhaana womuruchi ali munyumba ikhongo, mako obwali omukhaana welikondo! Ingubo yiye irambi yanabwa khuluusi lwetsahabu.

¹⁴Yali niyebikhile ingubo irambi yelikondo lilafu olwa yahilwa hango homuruchi, abakhaana ababeli babe nibamulonda, bosi bahilwa hango homuruchi.

¹⁵Benjila munyumba yomuruchi, nende obusangali nobuyanzi.

¹⁶Ibe, omuruchi wanje, nonyoole abasiani abenji abakhabukule obukono bwabakuka babwe singa abaruchi, ma ibe wakhabakhole okhwamiha khusibala siosi.

¹⁷Olwembo lwanje lulatsitsachisia ifuma yiyo khulwe inziayo, ne siomundu wosi yakhakhwitsoomie amatukhu kosi aketsanga.