Read lunyore ETSISABURI 48 Bible Online

ETSISABURI 48 - lunyore bible

ETSISABURI 48

¹OMWAMI nomukhongo owokhwitsoomibwa okhusila mwitookho lia Nyasaye wefwe, elili khusikulu sisie esitsienukhu.

²Sayuni, nesikulu sia Nyasaye, nesirambi khandi nesieng'ono indahi; nelitookho liomuruchi omukhongo, elileranga obusangali khusibala siosi.

³Mutsiminga tsia Sayuni, Nyasaye wemanyisie okhuba omulindi walio watooto.

⁴Abaruchi bebunjikha halala, ne nibetsa okhuseera esikulu sia Sayuni.

⁵Ne olwa balola esikulu sia Sayuni, bali okhuchenya; bamala nibaria, ma nibelukha.

⁶Bamala nibaba noburi nende okhutsunwa okhukali singa omukhasi oli neinumwa.

⁷Wabamuma singa emeeli ya Tarishishi enuywanga nende imbumbuyeka ingali okhurula ebukwe.

⁸Ifwe khwahul'la aka Nyasaye yakhola, ne luno khukalutsi mwitookho lia Nyasaye, OMWAMI Wokhunyala Biosi alasinga litookho inziayo.

⁹Nikhuli mu Hekalu yiyo, E Nyasaye, khupaalanga khukobuyanzibwo oburalilu.

¹⁰Ibe witsoomibwanga nabandu habundu hosi, ne ifuma yiyo yalanda esibala siosi, wamihanga mubulunji.

¹¹Lekhe abandu ba Sayuni basangale! Obukhalachi bubwo nobwahabwene; lekhe amataala kosi ke Ebuyahudi kasangale.

¹²Abandu ba Nyasaye, chende nimubotokhananga Sayuni ma mubusie eminaara chilikhwo.

¹³Mukoole amasisi khandi muhengelesie tsiminga tsialio, kho mube abanyala okhubool'la tsinzibulo etsitsanga mbu,

¹⁴“Nyasaye uyu ni Nyasaye wefwe inziayo, alaba omwemeli wefwe amatukhu kosi aketsanga.”