Read lunyore ETSISABURI 49 Bible Online

ETSISABURI 49 - lunyore bible

ETSISABURI 49

¹Hulile lino, siomundu wosi! Hulile, abandu mwesi abali habundu hosi,

²abakhongo nende abatu bosi, abahinda nende abatakha bosi.

³Amapaalo kanje kaliba amehinikhu; ndiboola amang'ana kobulwenyukhu.

⁴Nambukule obweyangu okhumanyilisia aketsingano, nende okhwinoosia akatsiboolanga olwamba nikhupanga obukhana

⁵Simbetsanga noburi tsinyinga tsia amanyakhano, olwambetsanga nimbotokhan'nwe nende abasuku,

⁶kata olwabandu babi abasubilanga mubuhinda, abekhonyanga sichila bali nemiandu eminji tawe.

⁷Omundu sanyala okhwenunula omwene tawe; sali onyala okhurunga Nyasaye obukusi bwobulamubwe tawe.

⁸Sichila omurungo kwobulamu bwomundu nokwobukusi obutinyu. Esia yakharunga sisiakhanyala

⁹okhumwikal'la okhureebwa musilindwa tawe, kata sisinyala okhuchila abe nobulamu inziayo tawe.

¹⁰Omundu wosi anyala okhulola mbu kata abandu abalwenyukhu bafwitsanga; khandi abandu abahingwa nende ebitutsi batibanga. Bosi mbwo balekhanga emiandu chiabwe khubandu bandi.

¹¹Ebilindwa biabwe nibio tsingo tsiabwe etsie inziayo; nimwo omwa bamenyanga amatukhu kosi, kata nikali mbu balinji nemikunda chiabwe abene.

¹²Obukhongo bwomundu sibunyala okhumwikal'la okhufwa tawe; asili butswa owokhufwa singa etsisolo.

¹³Henge mulole akekholekha khu yabo abesubilanga abene, amasila kekholekha khu yabo abasangal'langa obuhinda bwabwe;

¹⁴olufu lwakhababukule singa omwayi yemel'langa amakondi kaake. Abalunji balamiha khubo, olwe mibili chiabahinda chilibola bwangu musibala sie emakombe esili ehale okhurula mungo tsiabwe.

¹⁵Nebutswa Nyasaye yakhaasoole; yakhanunule okhurula khubunyali bwolufu.

¹⁶Orabelela olwomundu anyoolanga obuhinda, kata olwemiandu chichie chimetekhanga okhuba eminji tawe.

¹⁷Sanyala khutsia nobuhinda bubwe olwa yakhafwe tawe; siyakhayabilwe musilindwa nende obuhindabwe tawe.

¹⁸Kata nikali omundu uyanzisiibwe nende obulamu yibu, ma abandu bamwitsoomie khulwobuhinda bubwe,

¹⁹yakhatsie okhuba halala nabakuka baabe olwalifwa ahesiilima sibetsanga inziayo.

²⁰Obukhongo bwomundu sibunyala okhumwikal'la okhufwa tawe, asili butswa owokhufwa singa etsisolo.