Read lunyore ETSISABURI 5 Bible Online

ETSISABURI 5 - lunyore bible

ETSISABURI 5

¹Oreke amarwi khumang'ane kanje, E OMWAMI, ma ohulile okhulakaya khwanje.

²Ohulile okhulakaya khwanje okhwokhusaba obukhonyi, Nyasaye wanje khandi Omwami wanje! Ise saayanga khuibe, OMWAMI;

³ohulilanga omwoyo kwanje mukamba tsuli, mukamba ndachoomia amasaayo kanje khuibe, ne ninindil'la amakalusio.

⁴Ibe sioli Nyasaye osangal'langa obukholi bwobubi; ababi sibahuchil'lwanga okhuba imbeliwo tawe.

⁵Ababi sibalasinjila imbeliwo tawe; ibe obihil'lwanga abakholi bobusiamu bosi.

⁶Omumanga ababehi bosi, nochaaya abobulwani nende abobukaati.

⁷Nebutswa nyinjilanga mu Hekalu yiyo khulwo buyanzibwo obukali; nyala okhwekayakayanga mu yo ninyinama imbeliwo mulukoosi.

⁸OMWAMI, mako obwabasuku banje bali abenji! Unzemel'le okhuhesia obulalilo bubwo; olunjisie injila yiyo kho nase njilonde.

⁹Akabasuku banje baboolanga sikanyala okhusubilwa tawe; bakhaabanga butswa okhutibia. Amang'ana kabwe nakokhubehelesia khandi namarel'le, bachilanga abandu nibafwa khulwo bukaati bwabwe.

¹⁰Olekhe esiina sibafwile ma obahe esinyasio, E Nyasaye; Bakwe khulwo obusiemani bwabwe abene. Obakhunge okhurula imbeliwo khulwe tsimbi tsiabwe tsinyinji nende esikhu siabwe khuibe.

¹¹Nebutswa bosi abakhwilukhilanga ibe balasangala; khasotso bembenje khulwo busangali. Obalinde yabo abayanzanga eliira lilio kho basangale khulwe ibe.

¹²Okhuba Ibe, olaamilanga omulunji ikhabi, obuyanzibwo bumusoolanga singa esikhumba.