Read lunyore ETSISABURI 50 Bible Online

ETSISABURI 50 - lunyore bible

ETSISABURI 50

¹OMWAMI Nyasaye wobunyali al'lomanga; alanganga abomusibala siosi okhurula ebukwe okhwola emasaba.

²Nyasaye yakhanga singa obulafu okhurula Sayuni, litookho lieing'oono indahi.

³Nyasaye wefwe yetsanga, nebutswa munjila erali yamasilisi, omul'lo omukali kwatukhanga imbeliwe, imbumbuyeka ingali imubotokhan'ne.

⁴Alanganga likulu nende esibala bibe abakobokheli, olwa akhalachila abandu baabe esiina.

⁵Aboolanga mbu, “Bunjelesie abatsienukhu mubalere khu ise. Yabo abalomba indakano n'nase abakhwalia n'nabo emuma olwa bamban'na omusango.”

⁶Likulu liribulanga mbu Nyasaye nowobulunji; khandi ye omwene nomukhalachi.

⁷“Hulile, abandu banje, nase nzia okhul'loma. Nzia okhuhaana obukokheli khumabi kenywe, Isiraeli. Ise nise Nyasaye, oli Nyasaye wenywe.

⁸Ise simukondekhelanga khulwe emisango chienywe nende ebihanwa ebisambwangwa ebia munderelanga khasotso tawe.

⁹Ne kata mbwo sinyenya etsichulukhi okhurula mumikunda chienywe, nohomba tsimbusi okhurula musiayo sienywe tawe;

¹⁰tsinyama tsiosi etsiom'mutsuru netsianje, kata tsing'ombe tsiosi etsili mubikulu etsielefu netsianje.

¹¹Amanyonyi kosi akom'mutsuru nende ebili mwoyo biosi ebili mumikunda nebianje.

¹²“Ndaba nindi neinzala khane simubooleye tawe, sichila esibala nende biosi ebilimwo nebianje.

¹³Ise mbula ndakhalia inyama yechulukhi, nohomba okhunywa amabeele ketsimbusi noho?

¹⁴Muhaane khu Nyasaye omusango kwokhukhupa embwo, ma muhelesie Nyasaye wobunyali, biosi ebia mwali okhumwesuhila.

¹⁵Nimunanga ise olwa muli mumanyakhano, nase namusoole, nenywe mulanzitsoomia.”

¹⁶Nyasaye abool'langa omukholi wamabi mbu, “Esichila okobokhele mumalako kanje nisina? Esichilanga nol'loma khuke indakano yanje nisina?

¹⁷Ibe wanzikal'la okhukhulunjisia; ibe wasula okhulonda amalako kanje.

¹⁸Olwa walola omwibi, walomba n'naye obulina, ma nohambana nende abaheyi.

¹⁹“Wayikula omunwa kukwo okhul'loma amabi; Ibe siorimilanga okhuboola obubehi tawe.

²⁰Ibe wikhal'langa abaana benywe, ochiikhanga omwana wenywe mwene.

²¹Ibe wamenya nokholanga akene yaka, nase sili okhuboolakhwo esindu tawe, ma ibe opaalanga mbu ise fwana singa ibe. Nebutswa luno nzia okhukhukondokhela ma khumanyia singa kafwana.

²²“Hulile khu kano inywe abarambetsanga oluyali, ne ngarali mbwo namumume, ne siyakhabakhwoho owakhamusoola tawe.

²³Okhukhupa embwo nikwo omusango kwokhumbelesia oluyali, ne mukatooto ndakhanunule bosi abambulilanga.”