Read lunyore ETSISABURI 51 Bible Online

ETSISABURI 51 - lunyore bible

ETSISABURI 51

¹Umbeele tsimbabasi, E Nyasaye, khulwo obuyanzi bubwo oburalilu. Khulwe tsimbabasitsio tsinyinji weye tsimbi tsianje!

²Usaabe obubi bwanje bwosi, ma ukhole omutsienukhu okhurula mutsimbi tsianje!

³Ise manyilisianga abusiamu bwanje; ise ndabilisianga tsimbi tsianje.

⁴Ise ndakhwonela ibe ndakhwonela ibe wenyene, ma ndakhola ake ibe obalanga okhuba amabi. Kho oli habwene okhukhalachila esiina; oli habwene okhunaama esilaamo.

⁵Lola, ndebul'lwa mutsimbi, Khandi ndabelekhelwa mubwoni.

⁶Ibe wenyanga obulunji nende akatooto, witsusie amapaalo kanje nobulwenyukhu.

⁷Hinia tsimbi tsianje, mbe omusiyikhu, usaabe nase nzia okhuba omulafu tser're.

⁸Unzitsusie nobusangali nende obuyanzi, ma olekhe amakumba akofunakile kasangale.

⁹Obise obwenibwo khutsimbi tsianje, ma weye obubi bwanje.

¹⁰Olombe mu ise omwoyo omusiyikhu E Nyasaye, ma uremwo omwoyo omuhia khandi okwokhuhulila.

¹¹Oraafuuba ehale okhurula mumoni mumwo tawe; orahinia Omwoyo Omutsienukhu kukwo mwise tawe.

¹²Umete obusangali bubwo oburulanga mukhuhonibwa khukhwo, ma ukhole mbe namakani kokhukhuhulila ibe.

¹³Khe mbe onyala okhwekesia aboni amalako kaako, nabo balasukhana nibakalukha khuibe.

¹⁴E Nyasaye, ununule okhurula khutsimbi tsiobwiri ma umbonie, ne ndakhasangala okhulandia obulunji bubwo.

¹⁵Ukhonye okhul'loma, OMWAMI, nase nakhwitsoomie.

¹⁶Siwenyanga emisango tawe, khane ndakhahaan'ne emisango; siosangal'langa ebihanwa biokhusambwa tawe.

¹⁷Omusango okuhuchil'lwanga khu Nyasaye nomwoyo okwesikokele. E Nyasaye, ibe siwakhachaaya omwoyo kwokhwetutuhia nende okwokhweyama tawe.

¹⁸E Nyasaye obelel'le Sayuni ma olikhonye, wombokhe amasisi ka Yerusalemu obuhia.

¹⁹Nilwo olwolasangal'la emisango chiatooto nende ebihanwa biokhusambwa, ma etsichulukhi chilahanwa singa omusango khulusambwa lulwo.