Read lunyore ETSISABURI 52 Bible Online

ETSISABURI 52 - lunyore bible

ETSISABURI 52

¹Esichilanga niwekhonya khumabi kaako nisina, ibe omundu omukhongo? Obusubilwa bwa Nyasaye nobweinziayo.

²Ibe oloosianga singa obwonyala khusalisia abasio, ol'limi lulwo lufwana singa olumwo olwochi, wamenya nokulukunzanga obubehi.

³Wayanza amabi okhuyomba amalahi, khandi okhubeha khuyomba okhuboola obwatooto.

⁴Wayanza okhusaalisia abandu namal'lomo kaako, ibe omubehi!

⁵Khulwe yako Nyasaye alakhusalisia inziayo; alakhutiila ma akhuhinie hango haho; alakhuhinia musibala esia abali mwoyo bamenyangamwo.

⁶Abandu abalunji balalola akene yaka ma babe noburi; balakhutsekhel'la ibe nibaboola mbu,

⁷“Lole, uno niye omundu orayeletanga khu Nyasaye khulwo khuba nomulembe, nebutswa musilenje yisio yasubila mubuhinda bubwe obwinji, ne nakhaaba omulembe mutsinjila tsiobusiamu.”

⁸Nebutswa ndi singa omusaala kwomuseituni, okukhulanga munyumba ya Nyasaye; ise subilanga mubuyanzi bubwe oburalilu inziayo.

⁹Ise nakhukhupilenje embwo E Nyasaye khu kosi akawakhol'la; mutsimoni tsiabandu baabo naribule mbu ibe oli omulahi.