Read lunyore ETSISABURI 55 Bible Online

ETSISABURI 55 - lunyore bible

ETSISABURI 55

¹Ohulile amasaayo kanje, E Nyasaye; ne orasuula obureebi bwanje tawe!

²Umbulile ma ungalusie; Esihenda mwoyo sianje simal'le tsingufu.

³Ndi noburi obukali khulwa ebirisio biabasuku banje, ndubuywe nokhusandibwa khwababi, Baleranga amanyakhano khu ise; bali nelirima n'nase ma baisinyikhila.

⁴Ndi noburi obukali, ne ebirisio biolufu bindubuye.

⁵Ise mambilwe noburi nende okhutekela; oburi obukali bunyombeleye.

⁶Ndaba nindi netsimbaha singa likhuulwi, khane ndakhapulukha ndatsia ahanyala okhunyoola abuhuluukhi.

⁷Ndakhapulukhile okhutsia ehale, ma nombe obumenyo musitsiimi.

⁸Ndakhanyooye bwangu obwikamilo okhurula khumuyeka kwesihutsutsu nende imbumbuyeka.

⁹E OMWAMI koyania obul'lomi bwabasuku banje. Ndolanga abandu nibalwana nende okhusolana mwitookho,

¹⁰om'basu nobutukhu balibotokhananga, ne betsusiangamwo obusiemani nende esibi.

¹¹Okhumumwa khuliho siahabundu hosi; emihanda chiaitsulamwo okhusandibwa nende obukalama.

¹²Alaba nali omusuku unzekhel'langa, khane ndakhetinyilisisie; alaba nali omufukuli oundepaakilangakhwo, khane ndakhebisile okhurula khuye.

¹³Nebutswa niwe, owakhuchendanga n'nawe, owasiaje, omulina wanje wokhumwoyo.

¹⁴Khwali nende obutwakani bwomukari, khandi nikhusaaya halala mu Hekalu.

¹⁵Makano abasuku banje baafwa amatukhu kabwe nikaroola; makano batsia emakombe nibasili mwoyo. Obubi buli mutsingo tsiabwe nende mumioyo chiabwe.

¹⁶Nebutswa reebanga obukhonyi okhurula khu OMWAMI Nyasaye, naye nayambonie.

¹⁷Mutsuli, m'mubasu hakari nende butukhu, okhwekana kwanje nende liyoka lianje biolanga khu Nyasaye, naye alahulilanga omwoyo kwanje.

¹⁸Alangalusia mumulembe, okhurula mumahe akanwananga n'nako, nende khubasuku banje abenji.

¹⁹Nyasaye owamihanga inziayo, yetsa khumbulila ma abaleke; sichila basulanga okhwekalukhania, ne sibamuritsanga tawe.

²⁰Uyo owalinji omulina wanje khale winjiliye abalina baabe; umal'le okhufukula indakano yiye.

²¹Amang'ana ke kalinji amasiyikhu okhuyomba esiachi, nebutswa omwoyo kukwe kwalimwo lirima; amang'ana kaake kali amarelele singa amafura, nebutswa kakhalakanga singa tsinganga tsinzochi.

²²Lekhela OMWAMI amanyakhano kaako, ne alakhusinga muko; salekhangakhwo abandu abasubilwa okhulekwa tawe.

²³Nebutswa ibe E Nyasaye olenjisia aberi nende ababehi mubilindwa biabwe, nibasili okhwosia enusu yamatukhu kabwe. Nebutswa ise, nasubilenje mwiwe.