Read lunyore ETSISABURI 57 Bible Online

ETSISABURI 57 - lunyore bible

ETSISABURI 57

¹Umbeele tsimbabasi, E Nyasaye, umbeele tsimbabasi, sichila nzilukhilanga mwibe khulwokhunyoola omulembe. Usinganga singa linyonyi lisinganga abaana balio, okhwola olweimbumbuyeka musiinikha sietsimbaha tsialio eyela.

²Nanganga khu Nyasaye Oweikulu Okhusila, khu Nyasaye, oumbelesianga siosi esiandakhanga.

³Alangalusia nali mwikulu ma yasoole; Naleke yabo abasandianga. Nyasaye yetsa okhuumanyia ise obuyanzibwe oburalilu nende obusubilwa bubwe.

⁴Fumbiywe nende abasuku, abafwana etsisimba etsilitsanga abandu. Ameno kabwe kafwana amafumo nende tsisele; tsinimi tsiabwe netsinzochi singa tsinganga.

⁵Manyia obukhongo bubwo khwikulu, E Nyasaye. Nende obukhongo bubwo khusibala siosi.

⁶Abasuku banje barechekhele omubero khulwo khundila; Nyakhananga mumakani kanje. Bali okhuyaba obuko munjila mwambir'ranga, nebutswa abene bakwiyemwo.

⁷Ndi nobusubili obuhesikhu, E Nyasaye. Nanyembe nikhwitsoomianga ibe.

⁸Buukha, ibe omwoyo kwanje! Buukha, ibe litungu lianje nende obukhana bwanje! Nzia okhubuusia eliuba.

⁹Nakhukhupila embwo mumahanga kosi, E OMWAMI, Nakhwitsoomie mubandu bosi.

¹⁰Obuyanzi bubwo oburalilu bwoolanga nomwikulu, obusubilwa bubwo bwetilanga khumalumbesi.

¹¹Manyia obukhongo bubwo khwikulu, E Nyasaye, nende obukhongo bubwo khusibala siosi.