Read lunyore ETSISABURI 60 Bible Online

ETSISABURI 60 - lunyore bible

ETSISABURI 60

¹Nyasaye, ibe ukhufubile, khandi ukhulekele ifwe, wabeye okhukhutil'la oburima, ne luno kalukha khu ifwe.

²Ibe watekesisie liloba nende okhuliaraka nilialama; luno wil'ususie tsinyande tsialio, sichila lisabulukhananga mubitonye.

³Wachila abandu baabo nibanyakhana okhusila; khukwil'lananga singa Abemel'le.

⁴Wachetsiyia yabo abakhuritsanga, kho babe abanyala okhuhonokokha khubumumwi.

⁵Okhusoole nobunyali bubwo; okalusia obusaayi bwefwe, kho abandu bawayanza babe abanyala okhusoolwa.

⁶Naali muhekalu yiye, Nyasaye ubooye mbu, “Mubulechi ndakabul'la abandu banje esibala sia Shekemu nende olubanda lwa Sukotsi.

⁷Gileadi nesibala sianje, khandi Manase nesianje; Efuraimu nesikutu siomurwe kwanje, ne Yuda neindabusi yobwami bwanje.

⁸Nebutswa ndarumikhila Moabu singa olusalilo lwokhwesabilakhwo, ne ndafuuba ebilaaro bianje khu Edomu singa esimanyisio mbu nesibala sianje. En'no Abafilisiti bakhapaala mbu bakhupanga liyoka liobusangali khulwokhundeka ise?”

⁹E Nyasaye, niwina owanaumbile mwitookho eliasirwa noluhinga? Niwina owanaunzemel'le okhutsia Edomu?

¹⁰Ni siahene Ibe wakhusuula? Ibe siotsia halala nende abasikari befwe tawe?

¹¹Okhukhonye okhulwana abasuku befwe; obukhonyi bwesinamundu sibunyala esindu tawe.

¹²Nyasaye nali n'nefwe khulaleka; alaleka abasuku befwe.