Read lunyore ETSISABURI 62 Bible Online

ETSISABURI 62 - lunyore bible

ETSISABURI 62

¹Nindil'langa nokhwesimilisia mbu Nyasaye yambonie; ndeletanga khuye yenyene;

²ye yenyene niye ounindanga khandi oumbonianga, niye omusooli wanje, kho sindakhalekwe tawe.

³Kalabukula luhono sina khulwe inywe mwesi okhuseera omundu orali netsingufu, singa olukaka olutendekhele?

⁴Inywe mwenyanga butswa okhumuhinia habundu hahe aholukoosi; musangal'langa obubehi, mul'lomanga amang'ana ketsikhabi, nebutswa mumioyo chienywe mulakanga esilaka munwa siobubi.

⁵Ndeletanga khu Nyasaye yenyene, nare obunaayi bwanje muye.

⁶Ye yenyene niye ounindanga khandi oumbonianga; niye omusooli wanje, kho sindakhalekwa tawe.

⁷Okhuhonibwa khwanje nende olukoosi lwanje bieletanga khu Nyasaye; nomulindi omukufu, niye obwikamilo bwanje.

⁸Abandu banje, musubile khu Nyasaye amatukhu kosi. M'mubool'le amanyakhano kenywe kosi sichila niye obwikamilo bwefwe.

⁹Abandu bosi bafwana singa omuya okufurwanga, kata babe abakhongo nohomba abatu babula obukhonyi. Nobara khusipimilo ne onyoola babula obusiro bwosi; bali nobusiro obut'ti okhuyomba omuya kwakhuhelana.

¹⁰Orara obusubili bubwo mubulwani tawe; oranaaya okhunyoola obukhala mubunuli tawe; kata nikaba obuhindabwo bwakhametekha, oreleta khubwo tawe.

¹¹Ndahul'la okhuyomba l'lala Nyasaye naboola mbu, “Obunyali nobwanje,”

¹²ne obuyanzibwe noburalilu. Ibe omwene nomwene E, MWAMI orunganga buli mundu okhulondokhana nemilimo chie.