Read lunyore ETSISABURI 63 Bible Online

ETSISABURI 63 - lunyore bible

ETSISABURI 63

¹E Nyasaye, ibe oli Nyasaye wanje owandekombanga, omubili kwanje kwosi kukhwekombanga; singa liloba eliomu, eliralimwo imbolela nende amaatsi, nimbwo omwoyo kwanje kuli nobuluho khuibe.

²Umbuchil'le mbu khulol'le hatsienukhu haho, lekha ndole singa oli nobunyali nende ifuma.

³Obuyanzibwo oburalilu buyombele obulamu bwa khuli nabwo, khulwe yako nakhwitsoomie.

⁴Nakhukhupilenje embwo oluhono olwasili mwoyo; Nanjingul'le amakhono kanje khuibe nindi mubusaayi.

⁵Omwoyo kwanje nakulie lisabo ma nakwikure, nase nanyembe tsinyembo tsiobusangali nikhwitsoomianga.

⁶Kata olwamba ningon'ne musitanda nakhwitsul'le, obutukhu bwosi nakhupaalanjekhwo ibe,

⁷sichila ibe obetsanga omukhonyi wanje khasotso. Musiinikha sietsimbaha tsitsio nyembanga tsinyembo tsiobusangali.

⁸Mandanga khuibe, ne omukhono kukwo omusaatsa kulandetel'la.

⁹Yabo abatemanga okhunzira, balatsia hasi musibala sie Makombe.

¹⁰Bakher'rwe mihe, ne emibili chiabwe chiakhalibwe nende ebibwe.

¹¹Khulwa mbu Nyasaye niye ohaananganga obulechi khumuruchi, naye alasangala. Yabo abahaananga ebiesuho muliira lia Nyasaye, bakhamwitsoomie, nebutswa eminwa chiababehi chiakhekalwe.