Read lunyore ETSISABURI 65 Bible Online

ETSISABURI 65 - lunyore bible

ETSISABURI 65

¹E Nyasaye, kakhukhoyele ifwe okhukhwitsoomia ibe mu Sayuni, nende okhuhesia ebiesuho biefwe khuibe,

²Sichila okabusianga amasaayo kefwe. Abandu habundu hosi bakhetse khuibe

³khulwe tsimbi tsiabwe. Tsimbi tsiefwe netsingali, nebutswa ibe ukhulekheye.

⁴Bali neikhabi yabo abawela, abawaleera okhumenya hatsienukhu haho. Ifwe khwakhekure khulwe ebindu ebilahi ebili munzu yiyo. Okhunyoola tsikhabi tsiomu Hekalu yiyo inzienukhu.

⁵Okhukalusianga khulwo khukhuhelesia obulechi, khandi okholanga ebindu biokhuchenyia mbu okhuhonie. Abandu bomusibala siosi, nende abali oluchelekha lwe hale lweinyanza basubilanga khuibe.

⁶Ibe oretsanga ebikulu mubukono bwabio khulwe tsingufu tsitsio, nomanyianga obunyali bwobukhongo bubwo.

⁷Ibe osiling'anianga okhuhukuma khweinyanza, nende liyoka lia amarunda ke inyanza; osiling'anianga liyoka liabandu.

⁸Esibala siosi sibeye noburi, khubindu ebikali ebiawakhola. Ebikholwa bibio bichilanga abandu nibakhupa liyoka liobusangali, okhurula khundulo wesibala okhwola khundulo khundi.

⁹Omanyianga singa ohendelanga esibala olwokwisianga ifula; osilombanga okhuba esihinda khandi esiebiamo ebinji. Witsusianga emichela nende amaatsi, ne nohaana ebiraakwa mumaloba. Injila yokhol'langamwo njieino:

¹⁰Okwisianga ifula inyinji mumikunda echialimwa ma ochichusiamwo amaatsi; otubusianga liloba nende ifula yolunyilila ma kachila ebiraakwa ebisili bitititi bikhula.

¹¹Mako obwobukasu bubwo buchilanga nikhuchesa ebiakhulia ebinji! Hosi ahotsitsanga binyoolekhanga nibiliho mubwinji.

¹²Obwayilo bwitsuyemwo emiruko tsimbeka tsiosi ebikulu bitsuyemwo nobusangali.

¹³Ebikuuri bitsuyemwo amakondi; amabanda ketsuyemwo ingano. Buli sindi sihanzukhanga nende okhwemba tsinyembo tsiobusangali.