Read lunyore ETSISABURI 66 Bible Online

ETSISABURI 66 - lunyore bible

ETSISABURI 66

¹Mwitsoomie Nyasaye neliyoka liobusangali, inywe abandu mwesi.

²Mwembe obukhongo bweliiralie, mumuhelesie oluyali lwokhumwitsoomia.

³Mubool'le Nyasaye, “Mako obwa bili ebiokhuchenyia ebindu biokholanga! Obunyali bubwo nobukhongo okhusila, ne buchilanga abasuku baabo nibakhusikamila khulwo oburi.

⁴Buli mundu khusibala akhwekakayanga ibe; bakhwembelanga tsinyembo tsiokhukhwitsoomia, bembanga tsinyembo tsiokhukhuha oluyali.”

⁵Mwitse mulole aka Nyasaye akhol'le, ebiokhuchenyia ebiakhol'le mubandu.

⁶Yakalukhania inyanza okhuba liloba eliomu; abakuka befwe bambukha omuchela nibachendanga khubilenje. Habwene yaho khwasangala khu akayali nakhol'le.

⁷Yamihanga inziayo khulwobunyali bubwe narehe tsimoni tsitsie khu bamahanga. Kho abeindiri balekhe okhwechingil'la nokhumulwana.

⁸Mumwitsoomie Nyasaye, inywe abandu mwesi, amayoosi kokhwitsoomia khwenywe kahul'likhe.

⁹Niye ochilanga nikhuba mwoyo, ma siahuchil'langa ifwe okhukwa tawe.

¹⁰Nyasaye, wali okhukhura mukhutemwa; singa obwe efetsa esiiywanga nomul'lo nimbwo ibe wakhuteema.

¹¹Wakhulekha ifwe okhukwa mumureko, ma khandi wakhutukha emisiko emisiro khumikongo chiefwe.

¹²Walekha abasuku befwe nibakhusen'na hasi; khwasalila singa abandu ababir'ranga m'mul'lo nende m'mukhula kwamaatsi, nebutswa luno ibe ukhuler're habundu homulembe.

¹³Ise nakhuler're ebihanwa biokhusambwa munyumba yiyo; nambaane omusango okwa ndakhusubisia.

¹⁴Nakhuhelesie esiandaboola mbu nakhuhe olwa ndali nindi mumanyakhano.

¹⁵Nambane likondi singa omusango kwokhusambilwa khulusambwa. Nakhukhol'le omusango kwetsing'ombe etsichulukhi nende okwetsimbusi, ne omwosi kulatsia ikulu mumalumbesi.

¹⁶Mwitse ma muhulile, inywe mwesi abahaananga oluyali khu Nyasaye, nase nzia okhumubool'la akayakhol'la ise.

¹⁷Ndamulakayila nireebanga obukhonyi; ndamwembela tsinyembo tsiokhwitsoomia.

¹⁸Ndaba nindabisa tsimbi tsianje, khane OMWAMI siyahulila akanje tawe.

¹⁹Nebutswa siahene Nyasaye umbuliye; uhuliye okhusaaya khwanje.

²⁰Nzitsoomianga Nyasaye, sichila siyasula amasaayo kanje, nohomba siyabula okhumbelesia obuyanzi bubwe oburalilu tawe.