Read lunyore ETSISABURI 68 Bible Online

ETSISABURI 68 - lunyore bible

ETSISABURI 68

¹Lekha Nyasaye asinjile ne abasuku babe basalane; lekha yabo bosi abamusinyikhila belukhe khulwo khulekwa.

²Singa omwosi kuhutswanga nomuyeka, nimbwo asukumanga abasuku babe; khandi singa esinda esal'lukhanga nereywe mulilo, nimbwo abandu babi batibanga imbeli wa Nyasaye.

³Nebutswa abalunji bayanzanga, nibasangala imbeli wo MWAMI, bayanzanga nibakhupa liyoka liobusangali.

⁴Mwembele Nyasaye, mwembe nimwitsoomia eliira lilie, mumulombele injila yiye uyo ochendanga khumalumbesi.[3] Eliira lilie ni OMWAMI — musangale olwa muli imbeli uwe!

⁵Nyasaye, omenyanga mu Hekalu yiye inzienukhu, ahendelanga ababisandu khandi asoolanga abakhasi abalekhwa.

⁶Nyasaye ahelesianga abandu bes'soma tsinyumba tsiokhumenya mwo, khandi ahinianga ababohe mubuhambe, nabemel'la mubulakhuule bwobusangali, nebutswa abe indiri bakhamenye musiyieyie.

⁷E Nyasaye, olwa wemel'la abandu baabo, olwa wabachendia okhukhalania esiyieyie,

⁸esibala siatekela, ne ifula nekwa okhurula mwikulu, khulwo khwitsa khukhwo Nyasaye wa Sinai, okhwitsa khukhwo Nyasaye wa Isiraeli.

⁹Wachila ifula inyinji nekwa, nochila liloba elioma ndikalukha okhuba lilahi;

¹⁰abandu baabo nibalombamwo obumenyo; khulwo bulahi bubwo wafwita abatakha.

¹¹Omwami yahaana lilako, ne abakhasi abenji nibalandia amang'ana tsana nibaboola mbu:

¹²“Abaruchi nende abasikari babwe belukhanga,” Abakhasi abasikaye ingo bakabananga ebiali nibiyaakilwe.

¹³Emibili chiamakhulwi[4] chifunikhilwekhwo efetsa, ne amabaha katsio kang'inang'inanga singa etsahabu. (Esiachila balala khwinywe nibeyalisia mubiko biamakondi litukhu liobulwani nisina?)

¹⁴Olwa Nyasaye Wokhunyala Biosi yasalaania abaruchi khusikulu sia Salumoni, yachila etsaluchi nekwayo.

¹⁵Mako obwesikulu sia Bashani sili esiobunyali, esikulu sili nebikulu ebiatsobel'la ebinji ebirambi.

¹⁶Busina olwobetsanga khubutenje bwesikulu sisio siobunyali, osialanga esikulu sia Nyasaye yahula okhumenyakhwo? OMWAMI alamenya khusikulu yisio inziayo.

¹⁷OMWAMI yetsanga okhurula Sinai, nali nende etsielefu tsinyinji etsia amakaari kobunyali, natsia hatsienukhu hahe.

¹⁸Anina natsia ikulu habutenje, atsia nali nababohe abenji; abukulanga ebihanwa okhurula khubasuku. OMWAMI Nyasaye alamenya ebwene y'yo.

¹⁹Mwitsoomie OMWAMI, owetukhanga ebisiro biefwe buli litukhu; ye ni Nyasaye omuhonia wefwe.

²⁰Nyasaye wefwe ni Nyasaye wokhuhonia, ye no MWAMI, Nyasaye wefwe, okhuhonianga okhurula mulufu.

²¹Siahene Nyasaye yakhaarake emirwe chiabasuku befwe, yabo bosi abatsitsachil'langa okhukhola tsimbi.

²²OMWAMI ubooye, “Nangalusie abasuku benywe okhurula Bashani; nambachelesie okhurula mutsindungu tsie inyanza,

²³ma nenywe namukhwesele ebilenje mumatsahi kabwe, ne tsimbwa tsienywe natsikhombe amatsahi obwa tsienyele.”

²⁴E Nyasaye, abandu bosi baluutsi omwekhoyo kwobulechi bubwo, okhuchenda khwoluyali khwa Nyasaye, omuruchi wanje, natsia hatsienukhu hahe.

²⁵Abembi bemeye imbeli, ne abakhupi bobukhana balondangakhwo inyuma, hakari wabwe khuli nabakhaana abasasianga amanyanga.

²⁶“Mumwitsoomie Nyasaye mwibukana liabandu baabe; mwitsoomie OMWAMI inywe abolwibulo lwa Yakobo!”

²⁷Owokhuranga okhwitsa ni Benjameni, olwibulo olutititi okhuyomba tsiosi, ma balondekhwo abemeli ba Yuda nabandu baabe, ne abemeli ba Sabuloni nende Nafutali nabo balondekhwo.

²⁸Omanyie obunyali bubwo, E Nyasaye, obunyali obwawarumikhila nokhukobokhelanga

²⁹noli mu Hekalu yiyo Yerusalemu, ahabaruchi bakhuleer'ranga ebihanwa.

³⁰Kondokhela Emisiri inyama nabulimo eli musitundu; kondokhela abamahanga abayanga etsichulukhi nende ebimoosi biabwe, okhwola Olwa bakhusikamila nende okhukhuhanila etsahabu. Salania abandu abayanza obulwani yabo!

³¹Abarumwa baletsa okhurula Emisiri, Abandu ba Etsiopia balichinga amakhono nibasaayanga khu Nyasaye.

³²Mwembele Nyasaye, inywe amahanga kosi akesibala; mwembe nimwitsoomia OMWAMI

³³ouchendelanga mwikulu, likulu elialiho khale. Hulile olwa alangisianga nomwoyo kwobunyali.

³⁴Boole habulafu khukobunyali bwa Nyasaye, obunyali bubwe buli khu Isiraeli, ne obukhongo bubwe buli mwikulu.

³⁵Ibe obetsanga Nyasaye wokhurisia olworulanga hatsienukhu haho, Nyasaye wa Isiraeli! Ahaananga tsingufu nende obunyali khubandu babe. Mumwitsoomie Nyasaye.