Read lunyore ETSISABURI 69 Bible Online

ETSISABURI 69 - lunyore bible

ETSISABURI 69

¹Umbonie, E Nyasaye! Amaatsi ketsuye okhwola mwikosi;

²Ndehinikhanga mumatoyi mukari, ne habulaho habundu ahomu; ndi ikulu ahamaatsi katsia olutungu, ne amarunda kamaatsi kali ahembi okhumbila.

³Ise njonyele ninangisinjia mbu nyoole obukhonyi, mwikosi mwanje mwomele, Tsimoni tsianje tsichonyele, nitsihenganga mbula tsilole obukhonyi.

⁴Yabo abasinyikhilanga sila esifune nabenji okhuyomba liswi liokhumurwe kwanje. Abasuku banje baboola obubeyi khu ise; bali netsingufu ne benyanga okhunzira. Bainomba okhukalusia ebindu ebie ise raiba tawe.

⁵Tsimbi tsianje sitsiayebisa okhurula khuibe tawe, E Nyasaye; ibe wamanya singa ise ndali omuhingwa.

⁶Oralekha ndere es'simba murwe khu yabo abasubilanga mwiwe tawe, E OMWAMI Nyasaye Owokhunyala Biosi. Oralekha ndere es'simba murwe khu yabo bosi abakhwekayakayanga tawe, E Nyasaye wa Isiraeli.

⁷Ise nyekwanga khulwa amang'ana kaako, ma ndafunikhwa nes'simba murwe.

⁸Fwana butswa omundu mucheni khubaana befwe, Singa omucheni khubeinzu yanje.

⁹Obuyanzi bwanje khu Hekalu yiyo busambanga omwoyo kwanje singa omul'lo; amanyeko kosi akalaswanga khuibe, kakwitsanga khu ise.

¹⁰Ndetutuyianga khulwo okhuhonga okhulia, ne abandu nibanyeka;

¹¹Ndebikhanga tsingubo tsiesibeela, ne abandu nibanzekha.

¹²Abandu bal'lomanga khu ise khumihanda, ne abanywi nibakulunza tsinyembo khu ise.

¹³Nebutswa ise nasaaye khuibe, OMWAMI; nawe Nyasaye ungalusie munyinga yosi eyochomele. Ungalusie khulwobuyanzi bubwo obukali, sichila ohesianga lisubisio lilio eliokhumbonia.

¹⁴Umbonie okhurula mukhweinikha mubutoyi; usoole okhurula khubasuku banje, umbonie okhurula mukhweinikha mulutungu lwamaatsi.

¹⁵Oralekha omukhulula kwamaatsi okhumbir'rakhwo tawe; oralekha ndeyinikhe mulutungu; nohomba ndeinikhe musilindwa tawe.

¹⁶Ungalusie OMWAMI, khulwobulahi bwobuyanzi bubwo oburalilu; khulwesirenda sisio, umengakhwo!

¹⁷Orebisa okhurula khumurumikhili uwo tawe; Ndi mumanyakhano amakali ungalusie luno!

¹⁸Yitsa khu ise ma umbonie; usoole okhurula khubasuku banje.

¹⁹Umanyile singa obwa ndali okhunyekwa, singa obwa ndali okhusimbibwa omurwe nende okhubula okhuhebwa oluyali. Ibe ololanga abasuku banje.

²⁰Amanyeko kasalisisie omwoyo kwanje nase ndesikokele. Ndanaayanga ndakhabelel'lwa, nebutswa sikanyalikhile tawe; ninaaya mbu ndakhahotselesibwa, nebutswa sikanyalikha tawe.

²¹Olwa ndali neinzala, bambelesia esumu; olwa ndali nobuluho, bambelesia esilulu okhunywa.

²²Lekha amasabo kabwe kabaler're okhumumwa. Lekha amasabo kabwe amatsienukhu kabaler're okhukwa.

²³Obofusie tsimoni tsiabwe. Olombe emikongo chiabwe okhuba emitekhele buli khasotso!

²⁴Obamal'lekhwo oburima bubwo! Ne obululu bwelilekolio bubayombel'le.

²⁵Lekha amaheema kabwe kasikale butswa sila omundu, omundu wosi arakhabakhwo omwoyo mumaheema kabwe tawe.

²⁶Basalisinjia yabo abe ibe wahelesia esinyasio; bal'lomanga akokhusalila khwa abandu abawafumira.

²⁷Obakhalachile amabi okhumeeta khumabi kabwe, barakhalekhelwakhwo singa abalunji tawe.

²⁸Amera kabwe kasilisibwe okhurula musitapu siobulamu; ne barakhabalwa halala nabandu baabo tawe.

²⁹Nebutswa ndi mukhutsunwa nende okhufwa amakani, unjingule ikulu ma umbonie, E Nyasaye.

³⁰Nanzitsoomie Nyasaye nokhwemba olwembo; Naribule obukhongo bubwe olwa mukhupila embwo.

³¹Kano kalayanzisia OMWAMI okhuyomba okhumuhelesia ing'ombe, kayombele okhumukhol'la omusango kwechulukhi ikhulundu.

³²Olwe yabo abasandibwanga balalola yako, balasangala; yabo ebekakayanga Nyasaye balatinyilisibwa.

³³OMWAMI ahuyianga khukeyabo abatakhiywe, khandi siyebil'langa abandu babe abali mubuhambe tawe.

³⁴Mwitsoomie Nyasaye, E mwikulu nende esibala, munyanza nende biosi ebilimwo.

³⁵Alasoola Yerusalemu, ma yombokhe amataala ka Yuda obuhia. Abandu baabe bakhamenyeyo ma khandi bulabukule esibala yisio;

³⁶abolwibulo lwabarumikhi baabe bakhabukule liloba yilio, ne yabo bosi abayanza OMWAMI bakhamenyemwo.