Read lunyore ETSISABURI 71 Bible Online

ETSISABURI 71 - lunyore bible

ETSISABURI 71

¹OMWAMI, nzitsile khuibe mbu usoole khubasuku; oralekha ndekwe tawe!

²Ukhonye ma usoole sichila oli omulunji. Hulila amang'ana kanje ma umbabine!

³Oli olwanda lwanje lwobwilukhilo, khandi oluhinga olutinyu olwokhuusinga khubasuku; sichila ibe obetsanga olwanda lwanje khandi oluhinga.

⁴Nyasaye wanje, usoole khubandu babi, okhurula khubunyali bwabandu belirima nende ababi.

⁵OMWAMI, obunaayi bwanje buli khuibe; okhurula nisili omwana subilanga mwiwe.

⁶Ndesetamianga khuibe mubulamu bwanje bwosi, ibe waininda okhurula litukhu elia ndebulwa. Nakhwitsoomienje khasotso.

⁷Obulamu bwanje bwali esilolelo khu abenji, sichila ibe wali omulindi wanje omukufu.

⁸Khwitsoomianga ibe omubasu kwosi, khandi ribulanga akobukhongo bubwo.

⁹Oraasuula luno sichila ndi omusakhulu tawe; kata orandekha luno sichila ndi omutekhele tawe.

¹⁰Abasuku banje benyanga okhunzira; bal'lomanga nibalosia masilisi akokhunzira.

¹¹Baboolanga mbu, “Nyasaye wamulekha; chende khumulonde ma khumutile sialiho onyala okhumusoola tawe.”

¹²E Nyasaye, oramenya ehale n'nase tawe; Nyasaye wanje, yitsa bwangu umbabine!

¹³Lekha yabo bosi abaaseeranga balekwe nende okhwirwa. Lekha yabo abatemanga khusalisia basimbe emirwe nende okhuba netsisoni.

¹⁴Nare obunaayi bwanje khuibe khasotso. Nakhwitsoomie ibe munonono.

¹⁵Naribule akobulahi bubwo; naribule akobuhonia bubwo om'basu kwosi, kata nikali liyombele obwe ise nyala okhumanyilisia.

¹⁶Nanzitsoomie obunyali bubwo, ibe OMWAMI Nyasaye. Naribule akobulahi bubwo, ibe wenyene.

¹⁷Ibe wainzekesia okhurula mubwana bwanje, ma sil'lomanga khukebikholwa bibio ebiokhuchenyia.

¹⁸Luno olwe ise ndi omusakhulu, ne liswi lianje liakwiye tsimbutsi, oraafuuba tawe, E Nyasaye! Obe halala n'nase olwa ribulanga aketsingufu tsitsio nende akobunyalibwo. Khutsinzibulo tsiosi etsitsanga.

¹⁹Nyasaye, obulunji bubwo bwoolanga ikulu mumalumbesi. Wakhola ebindu ebikali; ne abulaho oli singa ibe.

²⁰Wairumiye amanyakhano nende okhusaalila, nebutswa naungalusisie tsingufu tsianje; olasinga okhurula khusilindwa.

²¹Olaakhola okhuba omukali okhuyomba obwa mbetsanga; olambotselesia.

²²Nakhwitsoomisie mwilele. Nanzitsoomie obusubilwa bubwo, E Nyasaye wanje. Nakhwembele tsinyembo nikhupanga lilele lianje, sichila ibe oli Omutsienukhu wa Isiraeli.

²³Nakhupe liyoka liobusangali olwamba nikhukhupilanga litungu; Nakhwembele nomwoyo kwanje kwosi sichila waimbonia.

²⁴Naribule akobulunji bubwo om'basu kwosi, sichila bosi abatemanga okhusalisie wabaleka nende okhubasimbia emirwe.